صباح الزمن الجميل
 

- إحنا الجيل إللي كان بيلبس يونيفورم وهو رايح المدرسة
الحكومي .
- كنا بنستأذن علشان نبري القلم برة الفصل ..
- كنا بنعمل غديوة ساندويتشات مع بعضينا في الفسحة ..
- وكنا بنتخاصم بالخنصر ونتصالح بالسبابة ...
- إحنا إللي ياما بوظنا شرايط كاسيت علشان دوسنا على الزرار الأحمر ..
- إحنا اللي شوفنا التليفزيون وهو بيقفل الساعة 12 بالليل ونفضل نقول وششششش ..
- إحنا إللي ماكناش نعرف إن فيه حاجة اسمها سياسة، غير يوم الجمعة في أنباء وأراء ..
- احنا اللي كسبنا 5 كيموكونو ورا بعضهم ..
- إحنا جيل الزلزال .. والإنتفاضة ... وحرب العراق والكويت
- إحنا إللي شفنا القرموطي في سر الارض .. وكريمة مختار في إعلانات تنظيم الاسرة وصفاء أبو السعود بتلعب مع فرشة سنان ومحمد رضا طول ماندي ضهرنا للترعه وبرنامج أماني وأغاني ودهب طارق علام ....
- إحنا اللي كنا بنشرب بعض فى غطا الزمزامية فى المدرسة...
- إحنا اللي كان أقصي أحلامنا عجلة المصيف .. والطيارة الورق الملونة
- إحنا شرايط الفيديو وبنك الحظ ومجلة علاء الدين وسينما الاطفال وعروستي ..
- مكانش فيه غير قناتين أولى وتانية .. وأهلي وزمالك .. وبوجي وطمطم .. وونيس ومايسة .. وماما نجوي وبقلظ .. وتوم وجيري ..و هرقليز وزينا ..
- إحنا إللي كنا بناخد جنيه جديد يوم العيد .ونفضل نصرف فيه مايخلصش ..
- إحنا الجيل إللي اتفرج علي "الطريق إلى إيلات" يوم عرضه مباشر لأول مرة فى السينما
- إحنا الجيل إللي كان بيخاف لو حد قاله عيب .. وبيقول آسف لو غلط ..
- إحنا الجيل اللي شاف شارع بحاله بيعمل كحك العيد مع بعضه .. وعيلة كاملة قاعدة تاكل مع بعضها ..
- احنا بتوع الشمعدان والسامبا وسنجام والكاراتيه ولايز والعسلية وكوتش اميجو إللي بينور والفانوس ابو شمعة ..
- إحنا جيل التليفون أبو سلك واخترنا لك ونادي السينما وبانوراما فرنسية ود.مصطفي محمود ..
- حضرنا الألفية ..
- إحنا الجيل إللي كانت لمته تفرح , وضحكته طالعة من القلب ..
- إحنا الجيل اللي كان بيطلع يحرك إريال التلفزيون عشان إرسال القناة الأولى والتانية يكون كويس ..
إحنا الجيل إللى مش هيتعوض✋ اجمل صباح صباح الزمن الجميل
منقول 💗♥️

كنا بنعمل غديوة ساندويتشات مع بعضينا في الفسحة ..
- وكنا بنتخاصم بالخنصر ونتصالح بالسبابة ...

رجعتيني للزمن الجميل
احلى ايام عنجد
وين ايامنا ووين ايام هاد الجيل

حبيت موضوعك كتير
يسعد قلبك هدوء
لا تحرمينااا