قصيدة القلوب البيض
متعب الحنجين لامنه ضوى
زرفل برجلي على شين الدروب
ولا خذ الا أنا من الهم اعوا
تضرب أنفاسي بسمعي هوب هوب
هوب كانت قبل لا أعاني هوا
بس صارت بعد ما أعاني هبوب
كل عرق بخافقي المرهق ذوا
كن خفاقي على جسمي مغصوب
دامني الصادق وأنا مالي لوا
ابك ياصادق وعيّد يا كذوب
حتى في حكيي مع نفسي اغوا
صار بيني وبين ماعندي أسلوب
الا في الشعر أبقى شيخ المستوى
أحترق لأجله وانا ادري اني اذوب
ما هو شعر اللي الى قلّ ارهوا
اما شربوا خمر ولا أكلوا حبوب
عزّتي لي واشهد أن حالي طوى
طوي زلّ المصمكي قبل الغروب
ما هي بلحية ولع ولا جوا
أعوذ بالله العرب شبوا شبوب
كل ما تعطي مجرّحهم دوا
كنّك تعطيهم من ذنوبك ذنوب
القلوب البيض ملعونة ثوا
لا تشل ولا تزل ولا تتوب
ويش أقول وويش أعيد ووا .. ووا
أخذها من كف صاحب ومحسوب
بيّض الله وجيه سمحين النوا
ولعن الله أبو سودان القلوب
وش في عيونك
وش في عيونك ليه ماعاد تغري
وهي من اول شمس واقمار وزهور
عيونك الارض الكبيره وتدري
اني على هالارض حتى لو تدور
يقل لك صبري او يزيد صبري
ماراح تفرق دامني فيك مجبور
يزيد لك صبري او يقل صبري
ماراح يفرق دامني فيك مجبور
احبك بكسري واحبك بجبري
واعيش بك حتى ولو كنت مهجور
اقل واجد .. وان لقيتك ياكثري
وارجع اقل ان رحت عني يا مغرور
والبعد مانزل ولا زاد قدري
لكنه اوجع قلب واستهلك شعور
والبعد مانقص ولا زاد قدري
لكنه اوجع قلب واستهلك شعور
ضحكاتي ونبرات صوتي وشعري
خذها تراك مباح مني ومغفور
بترحل ارحل بس رجع لي عطري
العطر ريحة روح ماهو بديكور
لاتجيب لي عذرك ولا اجيب عذري
مافيه احد منا يا محبوبي بمعذور
لاتحسب ان جرحك حبيبي بيهري
انا من اللي لا انجرح قال مشكور
الثقب هذا اللي تركته بصدري
هو نفسه اللي راح يدخل معه نور
الثقب هذا اللي تركته بصدري
هو نفسه اللي راح يدخل معه نور
أنا جنوني وأفكاري جنونية
تخطي بي الناس واستعذب خطاياها
احساسي اني اسامحهم طواعية
يطير بي فوق هام السحب وأعلاها
حفظني ابوي معلومة اساسية
أكارم القوم تعفو عن دناياها
وعلمني انسى الردا وازين النية
ولا اشوف الأوادم من زواياها
الوجه بالوجه والنيه إلهية
واللي بيدور على الزله بيلقاها
من تجربة عمر وابحاث اجتماعية
يستحقر الناس من يكشف خفاياها
ومن تجربة عمر وابحاث اجتماعية
الناس ما تغلي الا اللي يتحاشاها
اقولها والخصومات انتقائية
ناس تتحداني وانا ما اتحداها
ألعب معاها المباراه النهائية
من شان اجي من وراها واتعداها
الهم كهم ماهو ذات اهمية
الا اذا كان في النفس ومزاياها
وعلى كثر ما تعبت من المثالية
على كثر ما اعشقها واتحلاها
ومن شان اعيش الحياه بكل حرية
ركلت كل الاماني من مقفاها
الا امنية في خفوقي لا طبيعية
في كل ليلة اغمض عيني ألقاها
ياليت طولي شبر او اصغر شوية
هذي امنية عمري اللي انا اتمناها
بطب في شنطة اليد الرمادية
وبعيش من بين اشياها واشياها
افضل من متابع اخبار العربيه
ومتابع الناس ومتابع سواياه
قصيدة الدروب
ربي اغفرلي ياربي يا غفار الذنوب
يوم ما ينفع عيال آدم الا اعمالها
واجعل السيئات مني طريقه لاجل اتوب
واجعل الحسنات مني بعشر امثالها
انت ياللي فضلك مديم ماهوب محجوب
يوم خلقك فضلها مرتبط باحوالها
فاطر السبع السماوات ما مسك لغوب
ما عزب عن شوفك الذره ومثقالها
جعلني يارب لاني قنوط ولا شجوب
نفس ما انت تّولاها لا مولى لها
لا تكني لي وانا نوب يا صبري ونوب
اتحايل دمعة الياس ولا احتالها
تشرق الدنيا على الكل لكن الغروب
يوجع قلوب المجاريح بس لحالها
نفسي أنفس تجمد من الظلام وما تذوب
لين يرد الها الشعاع ويرد اشعالها
الجروح انواع واقسى الجروح ام الثقوب
ان بقت عزّى لها وان برت عزّى لها
ان دخلها النور شبت من الذكرى شبوب
وان طلع منها ترك من وراه ظلالها
فدام هذا الليل ياخذ سعادات القلوب
ليت لامنه خذاها يرد بدالها
ان تغصّبنا براضي رضينا بمغصوب
شرهة الدنيا على الطيب من رجالها
يا وسع صدر الحقيقه على ضيق الكروب
مالك الاحمال ماهو مثل حمّالها
الاماني حيلة العجز و ابليس اللعوب
والله انه خير من طردها همالها
كل عارق راس يرقى يدور للهبوب
وتضربه بجنوبها وتضربه بشمالها
ما خلق ربي جبال البسيطه للركوب
بس حنا من شقاوتنا نرقى لها
عزت علي نفسي
عزت علي نفسي ونفسي عزيزة
ماهي بترضى موقف الذل والهون
الله جعل فيها كرامه غريزه ياكون
ف عالي الهرم ولا ما كون
والعمر ما يسوى بلا عز بيزه
حتى ولو في البنك مليون ومليون
وترا الفخر يمن الفتى ما تحيزه
لا صار ما يقدم وغيره يردون
الطيب في الطيب من الله ميزه
ولا الرخوم رخوم مهما يسون
واللي مراجلهم لفتره وجيزة
يستغفلون النآس والنآس يدرون
قصيدة كنت احسب
كنت احسب ان قليلي بعينك كثير
واثر اللي اسويه.....مايفرق معك
يوم انتثرت من العواصف والهجير
انا الوحيد اللي بيديني ؟ جمعك
واليوم يوم انه نفح منك العبير
ياورد صرت تجرّح اللي يزرعك ؟
ماكان هذا الظن يا الحلم الكبير
خل الظنون اللي تغرّك .. تنفعك
أنا الغلا عندي أشوف أنك بخير
وأنت الغلا عندك هو اني اخدعك
انا احبك بس ماهو..... للأخير
يعني تبيني اتبعك؟.... ما اتبعك
انا جهاتك الاربعه وانا المصير
وانت اقدم اصوات القديم ومسمعك
بكره تعلّمك الليالي.... وش يصير
وتعرف وش ضيّعت واللّي ضيّعك
رح قد ماتقدر واذا... بتطير طير
ماني معك.... ولكن أشيائي معك