قصيدة لو نسيت
لو نسيت العمر ما انسى دمعتك
صرخة ذابت من عيونك دموع
ترتعش مرتاعة في وجنتك
وانتفض قلبي لها بين الضلوع
أزعجت صمت الليالي عبرتك
بالخفا ثوره وبالظاهر خشوع
تسكب الدمعه وتظمى نظرتك
مشهد النظرة وهي تظمى يروع
يا ضياع العمر ضيعة بسمتك
ضاع معها خافق مثلك جزوع
ليت من يمتص جارح لحظتك
والفرح يشعل دياجيرك شموع
قصيدة تدلل علينا
تدلل علينا ياسمـي الظبـي وش عـاد
تدلل ولك بامر الهوى شافـع عنـدي
ولك في خيال الشاعر المهتـوي ميعـاد
ومجلس على غيمة وليلة قمر نجـدي
اسافر معك لبلاد وانزل معك في بـلاد
ومن غيمـة لغيمـة ولا للسمـا حـد،
رسمتك ضحوك الفجر يافرحة الاعيـاد
ولمعة شعاع ينغمس فـي نـدى ورد
وغنيت بك صوت لقلب الهـوى ميـلاد
ونغمة غرام ذاب في لحنهـا وجـدي
اشوفك مطر هتان لا بـرق لا رعـاد
من الوسم يبعث بالصحاري زهر ودي
احبك وصل وبعاد احبك رضا وعنـاد
ولايختلف وعدي ولاينتقض عهـدي
قصيدة ارفع راسك
ارفع راسك انت سعودي
طيبك جاوز كل حدودي
مالك مثيل(ن) بالدنيا
غيرك ينقص وانت تزودي
فارس و اجدادك فوارس
و اصبحت لبيت الله حارس
مغروس بالمجد و غارس
في ميدان العز شهودي
علمك غانم وجارك سالم
يخشى من هيبتك الظالم
راعي صمله دايم والم
سيف و قلب وفعل زنودي
بالعالم ما مثلك مسلم
دايم بالفضيله محرم
الخايف بدارك منعم
وعن دخيل حماك تذودي
دايم سيفك بيدك سلّه
ما تغمد سيفك منذلّه
و حجاجك دايم منفلّه
وأنت بنصر الله موعودي
فهد القائد فهد الرائد
فهد الصقر الحر الصايد
و العيد بعون الله عايد
وسعودك ياوطني سعودي
قصيدة غريب الدار
غريب الدار ومناي التسلي
أسلي خاطري عن حب خلي
سمعت الشور من قاصر معرفه
يحسب البعد عن داره يسلي
أسافر عنه من ديره لديره
عساي اسلاه لكن ما حصلي
أهوجس فيه وأنسى إني نسيته
وأفكر في ليالي(ن) قد مضن لي
وأنا لاجيت أبنساه إلتوابي
خياله وأنهمر دمعي يهلي
وأشوفه واقف(ن) من دون دمعي
حبيب القلب في عيني يهلي
دعاني ياغريب الدار عوّد
ترى مالك محل إلا محلي
مكانك في عيوني ياعيوني
وقلبي من غرامك مايملي
قصيدة ليتك معي
ليتك معي ساهر(ن) ليل الهوى كلّه
مانوم انا وانت لجل الحب سهراني
ترى السهر مع حبيبك يبري العلّه
لا صرت شفق(ن) وهو عليك شفقاني
كلش طراته الى وافق على حلّه
والا ترى كل شئ يالغضي فاني
لا عاش خل(ن) تنكر في الهوى خلّه
يوم(ن) حبيب(ن) ويوم(ن) يصيرقوماني
وش فيك دايم تعسر القلب واتّلّه
اخاف يوم(ن) يجي ما عاد تلقاني
قصيدة ياضايق الصدر
ياضايق الصدر بالله وسع الخاطر
دنياك يازين ماتستاهل الضيقة
الله على مايفرج كربتك قادر
والله له الحكم في دبرة مخاليقه
حلو العيون استهانت دمعها الحادر
كف العباير حزين الدمع ماأطيقه
حرام كيف الحزن يغشي وجهك الطاهر
والورد في وجنتك حرام تجريحه
يفداك قلب على ماتشتهي حاضر
يفداك باللي بقى لي من معاليقه
مافات خله ولاتهتم من باكر
واغنم من اليوم ماساقت توافيقه
قصيدة ياغالي الاثمان
ياغالي الاثمان غلّوك بالحيل
من يوم سمّو بك جميل المحيا
شخص(ن) تمنيته على العدل و الميل
و الحمد لله يوم خلّي تهيّا
اشبهه بالّلي عسيف (ن) من الخيل
تلعب وانا حبل الرّسَن في يديّا
أورق غرامه مثل غرس(ن) على سيل
مشهاة قلبي يوم جالي شهيّا
أعن له عنَّة هَل الكيف للهيل
ما ذاق راعي الكيف انا ذقته هنيّا
حبَّه سرَى بي سر ية الغيم بالليل
نسيم ليله قال للشوق هيّا
قصيدة ليالي نجد
ليالي نجد ما مثلك ليالي
غلاك اول وزاد الحب غالي
ليالي نجد للمحبوب طيبي
امانه نور عيني يا ليالي
حبيبي ولا ذكرت انه حبيبي
دريت اني حظيظ وزان بالي
على شانه تهاونت المصاعب
اذوق المر لَجل رضاه حالي
وإلى من الزمان اشتد حره
لقيت بقرب مضنوني ظلالي
عفا الله عنه مما جاني اول
غسل حبّه جميع الهم تالي
قصيدة نامت عيوني
نامت عيوني
على حسنك وشفتك حلم
ازاير الليل ،ليل البارحه عدني
متى تجيني مثل ماجيت حلم(ن) علم
يازايد القلب خفقه بالهوى زدني
ترى البخل من كريم الأصل مثلك ظلم
ياظالم اللي يوّدك ليه تجهدني
سويت في قلبي اللي قد عطيتك ثلم
ياماخذ القلب وتاخذني وتجحدني
ماهوب عند العرب وأهل الجماله سلم
إنك بما تاخذه مني تهددني
وكاد محد(ن) تعرّض للعيون وسلم
لاشك أنا بالوفا قلبك معاهدني
قصيدة نوى القلب
نوى القلب نيه
مانواها لاحد غيرك
نوى القلب يمشي لك
على السمع والطاعة
مع الشك والغيرة وهجرك وتقصيرك
أحبك وأقول أمرك له الروح خضاعه
جمعنا طريق الحب وانور بتنويرك
على صدفة لقلوب الأحباب جمّاعه
ملكني هواك وقادني بامر تدبيرك
أمانه معك روحي من البعد ملتاعه
تغزلت بك والشعر من بعض تعبيرك
كلامك سحر يخلف موازين سمّاعه
تقول الغزل مني شغل كل تفكيرك
عسى واعسى والنفس بالزّود طمّاعه
قصيدة أواه يا قلب
أواه يا قلب عليل تعلَّقت
في حب منهو بالنواعس فتني
حاولت عيني تمتنع ما تملكت
حبه مَلك قلبي وفكري وظني
ليلة لقانا يا ضميري تلوعت
هاجت شجوني والعيون أهملني
عز الله اني بالموده تحملت
محد(ن) فزعلي وخفف الحمل عني
حبه ذبحني ليتني ما تولعت
منه العذاب و زايد الشوق مني
لا قلت أبسلى رغبتي ما تمكنت
انا الذي في حبه ابكي و اغنيّ
لو إني من اول للغرابيل ثمَّنت
ما جيت حد حماه ولا طعني