قصيدة انهيار انسان
نعم كثر التعب حاجه
تؤدّي لإنهيار إنسان !
و أنا ؟ ما أوعدك إنّي
بـ أتم بـ عِشرتك ، واقف
أروح و يبقى لك عندي
معزّة ، و إحترام ، و شان ؟
أو أبقى بـ الكذب جنبك
و أنا من داخلي ~ عايف !
حشا ما جيت لك { شايل }
عشان أطلّعكْ غلطان !
و دليل إنّك مزّودها معاي
وقلت : ما يْخالف
أشوف و أسكت و أحزن !
أبيك تْحس بـ الأحزان
و وضعي حيل جايز لك
حزين و ساكت و شايف !
تجازف في علاقتنا
ولاحسّيت بك ندمان !
خسرنا بعض ؟ مو منّي !
أنا ما قلتْ لك : جازف
ترى ما خفت من بُعدكْ
ولا من غيبتكْ زعلانْ !
أنا واللـــه من قربك أحاتي
[ غدرك ] و خايف
كثييييير أشياء صارت لي
حزينه ، وموجعه أحيان
ولا شفتك تواسيني !
مع إنّك : تدري و عارف
ترى ما جيت أبكْسِر خاطرك
لا قلت لك : تعبان !
و لا أظن تنهي جروحي حبيبي
قولتك .... آسف
حبيبي لا ما تنفع صديقي ؟
لأ ، ولا " أخوان "
أبي لي شي يمنعني
أصدّك لمّا نتصادف !
قليل من التَعَب يكفي
يا غالي لإنهيار إنسان
و كثير من التَعَب فيني
من أسبابكْ و أنا واقف !
قصيدة قول عادي
قول عادي .. بالي الليله طويل
شُوف لِك عذرٍ قديمٍ وأقبِلَهـ !!
لا تحاتي
قلبي مِتعَوِّد يشيل
الجُروح اللي تجي له مُقبِلَه
طيبتي صارت مثل كف البخيل
أيِّ شَي طايح .. تِشُوفـه ؟ تحمِلَهـ
و عزِّتي تقدر تِسَمِّيها : النخيل
لأني شامِخ .. والعواصف قاتِلَه
وعادي جداً .. إنِّي الليله عليل
الحزن يحْسِبني واحد مِنْ هَلَه
ومو غريبه .. لو تِمَنِّيت الرحيل
البقاء أحيان , يعني .. البهدلة
في غيابك .. ما لَهَا الضيقه مثيل
وربِّي اللِّي .. ما يشاءه , يفعلَه
مِنْ يلاقي لـ دنيتي هذي بديل ..؟
خل يجيني أي شخص .. أبَدِّلَه
وعيب راسي لا بغى شيء مستحيل
يوصله مو طيب .. غصبٍ يوصلَه
ليه راجع ؟!
ليه ذاكر ..؟
يـ الأصيل ..؟؟
إنت ضايق .. ؟!
في خطأ بالمسألَه !!
وليه تبكي مِنْ كلامي يـ الدخيل ..؟
المشاعر .. ما لَهَا بقلبك صِلَه ؟!
و( البلا ) .. إن حَبْ رجالٍ " ثقيل "
ينسى مِن حُوله ويسْمَع ( مُذهلَه ) !!
مِن عرفتك .. ما بقى بـ اليَد .. حيل
ولو بكيفي ..؟ [ قلبي ] محدٍ يدخلَه
ومِن عرفتِك .. حظِّي العاثر يميل
أعترف لِكْ إنِّي ( عاجز ) أعدِلَهـ
فاقد الإحساس / ما يعطي القليل
وإن عطيته إحساس قلبك ؟ يقتِلَهــ
إيه بـ أرحل والطريق أدري .. طويل
مشكلهـ " قربك " .. وبُعدِك مشكلَهـ
وإن خذاني المُوت إترك قال وقيل
قول هـ الجُمله .. وخطاك محلِّلَه
[ ربِّي إلهَم أهلهـ الصَبر الجَميل
وإرحمـه يا رب وإحسِن مدخلَه ]
قصيدة بــــ الحلم ـــــلاد
" تعريفـ المُحَـال "
جاني واحد قال : بسأال كم سؤال
وقبل يسأل قلت : أنا ماني خبير !
قال: جاوب بس , يا ولد الحلال
وكل كلمه حِطَّهَا .. فبيتٍ صغير
قال نبدي : شنهو تعريف المُحال..؟
قلت :
خَل الكلمة
فـ الشطر الأخيـر ..!
القهر : إن شفت دمعـات الرجال
والوطن : ( إنسان ) .. مِتغيِّر كثير
والطفل : لعبه على شاطـي الرمال
والأمل : إحساس في عين الضرير
الوفا : [ قلبين ] .. يجمَعهُم حلال
والرَجُل : اللـي علـى أهلـه يغير
والرجا : لا قلت : للواطـي تعال
والفشل : مدري .. ولكنـه مرير
الشعر : في وقتنا .. بدر وطلال
وكان أوَّل : حيـل يعجبنـي جرير ..!
والغلا : إحساس إلى حَـد الخيال
والعِشِق : لا شفت مَعشُوقِك تطير
والجفا : إعكس مفاهيم / الوصال
والوَصِل : يعنـي تأكَّـد فيك خير
والعقل : تِسْفَـه أقاويـل الجهال
والجهل : إن قلت عن نفسك كبير
والخطر : لا صار ما عندك مجال
والبلا : إن صرت معدوم الضمير
والعجب : لا صرت تسأل منهو قال
والتعب : إن كنت تِبْحَثْ عن مصير
الغنى : بالنفس ما هو راس مال
والفقر : من كان .. بأعماله فقير
يكفي يكفي .. أسئله إنهي الجدال
ويالله علمني عَن .. السِّر الخطير
ما أبي تضرب لي في غيرك مثال
قول : عنِّك وإعتبر سِرِّك في بير
جات طعنـه مِن جنوبك والشمال
يعني وضعِك بين مِن حُولك خطير
صاحبـي وإن ضاقت بعينك ليال
لك فرشت القلب مفروش الحرير
في [ بلاد الحلم ].. ممنوع العقال
والمصيبة الشعب ما أختار الأمير
وما ألومك .. كان شدِّيت الرحال
دام بيتك جرح / وفراشك حصير
هذا تعريفي إلى كلمة : مُحَال
شيء ودِّك فيه ولا يمكن يصير ..!