قصائده
مقل جداً في نشر قصائده
رغم جمالها وشموخها
تبحر مع المعاني العميقة
من خلال قصائده
تتصف أغلب قصائده
بـ الحكمة
المستقاة من تجارب الحياة
أترككم مع أغلب قصائده المتوفرة
من اجمل القصائد التي لها تأثير
قوي على شخصيا ولم امل من قراتها
:
:
:
على حسـب ما مـرني ومن تـجارب الاولـين
وجهة نظر و يـجـوز فيهـا الاتفاق وَ الانـقـسـام
...
اترك مسافه كافيه بينـك وَ بـيـن الآخريـن
بعض البشـر ودك حـدود المعرفه معهم سلام
...
اصمت وَ لا تحرص على كثر الكلام الصمـت زين
اللّي سكوته ساتره يمكـن يعـريه الكلام
...
وَ إذا تكلمت احذر تكون أكثر المتكلمين
السالـفـه لا طولت يضعـف معاها الاهـتمام
...
وَامزح ومزحٍ باللسـان أخيـر من مزح اليـديـن
مزح الـرجال العاقله على حـدود الاحترام
...
واضحك و لا تضحك
برفع الصوت رفع الصوت شين
من الادب والذوق عند الضحك ضحكٍ بإبتسـام
...
واكرم وبيـبان الكرم واجد ولا يحتاج دين
وَ ترى الرجال إكرامها ما هوب في كثر الطعام
...
وَ احلم وَ لا تغـضب وَ لا تعجل وَ لا تـشـري بدين
وَ شـاور ولو رايك معك لا شـرت عداك الملام
...
وليا شريت بدين لا تبطي على المتجمليـن
كلٍ حلاله غاليٍ عنـده لو انـّه ما يـسام
...
وَ لاجاك مديونك معه بعض الوفـى وَ بعضه لحين
فـأسـتـد باللّي جاك وشدراك لله الـدوام
...
وَ ترى التغافل فيه لذه وانـشـد المتغافلين
وان جات كلمه توجـع اطلقها مـع سـرب الحمام
...
وارضى ليا جاك الرضى لو العـذر ما هـو سميـن
وَ تـرى التسامح ميـزة الساده رفيعين المقام
...
وَصادق واذا صادقـت ما جربت ما صادقـت لـين
اما يطول بك السهر والا يطيب لك المنام
...
واصدق مع نفسك وتلقى نفسك من الصادقين
والنفس خيل ابلـيس لا تعطيه نفسـك وَ اللجام
...
وليا نصحـت انصح خفى لا تفضحه فالحاضرين
ترى الرجال يقودها لين الحكي قود الخطام
...
ولا اتواضع في حضور العالم المتكبرين
تعامل بنـفـس الطريقة معهم وَ نفس النظام
...
واخلاقك وَ تواضعك عامل بها المتواضعين
ونصـف الادب مجامله جامل و لا تجامل لئام
...
وَ إذا تسولف عن طموحاتك مع المتفرغين
كنك تسولف للنـصارى فالحـلال وَ فالحرام
...
وَ العمر ماهو فرصةٍ وحده وَ لاهـو بفرصتين
مع كل مطلع شمس لك فرصه وَ خطوه للأمـام
...
هذا وَ لازلنـا تعلـمنا الليالي وَ الـسـنين
وَ العلـم أخير من الجهل وَ النور جلاي الظلام