كتبتني بأول سطر في كتابك
ونسيتني فيني وفيك اذكروني
وان علني بعض المزن من سحابك
أنا غرقتك في سحايب عيوني
اخاف ما يشبه رجوعك ذهابك
الشوق يذبل في كثير الظنوني
واصعب سؤال ما درى عن جوابك
يسكب خيوط الفجر داخل جفوني
كل الكلام اللي بقلبي هلا بك
تهز لك جذع المسافه شجوني
قصيدة الرياض العمر
البارحة واهل الوفا سهر وسهاد
والحاجب الطلق الرخي صار معقود
والناس خل الحكي ما تقبل الزاد
واللي فعل هالفعل خايب ومقرود
دام الرجال جبال والعز وقّاد
يا جهلهم ما انهز في هالثرى عود
يا دارنا دام الغلا ورث الاجداد
خطاك سوء الجهل واحلامه السود
تبقى الرياض العمر فعيون الاسياد
مر المربّع وانشده عن هل العود
هذي ثلاث قرون في دار الامجاد
والدار لاهل الدار من زود في زود
ندري لنا من بين هالخلق حسّاد
واللي بنعمه من هل الشر محسود
انّا هل العوجا مهمات وجهاد
وانّا لبيت الله خدام وجنود
حمالة المصحف وغيث للاجواد
ولكل ناوي شر نار وبارود
وانّا الغضب والجهل لاجات بعناد
وانّا العقل والعدل والطيب والفود
داري سيوفك حدب ورهاف وحداد
تاريخها بالفخر والعز ممدود
قصيدة رحلت
رحلت وجمّع طيوفك حبيبي لا تعذبني
تعبت اجمّع طيوفك وعيت ترحل بدونك
حبيبي ذا شعوري صدق قلته لا تكذبني
وقفت وكانت الذكرى مشيت وكانت عيونك
اهد اللي يعلقني بحبك والغلا يبني
تصدق لين مريته مكانك يسأل اش لونك
اصد وكني المخطي سؤاله عنك يتعبني
ألا ياخل يا صعبك ولا ياخل يا هونك
أنا ودي بعذروب على وصلك يعاتبني
واثر حتى عذاريبك بياض يشبهه لونك
بربك لا بغيت ارحل بعيد هناك قربني
ترى لو مرت وجيه كثيرة ما يكفونك
قصيدة الرجال أفعال
الرجال أفعال وأقوال ومبادي
والزمن ما علم البخل العطيّة
وباخص الدنيا يقود ولا يقادي
والصّواب اللّي يعلمك الخطيّه
والردي وجهٍ كريم النفس غادي
على ايدينك يالرّدي تكرم ايديّه
والنوايا بالصّدور وبالفوادي
والصلاح بلحمةٍ بالصّدر نيّه
هيه يا صوتٍ من البارح ينادي
بين خلجان الغلا والمقدريّه
نخلة التاريخ تنبت من بلادي
نخلةٍ صارت لها الدنيا هديّه
الوفا في ديرتي ما هو بعادي
من مهاد الطفل لا حد المنيّه
بين كفّينه رجالٍ للهجادي
ولاجل عينه لو تموت الروح حيّه
والرفيق اللّي أنوخ له ودادي
ما عليه من الزمان وما عليّه
الجواد يجيك من ظهره جوادي
والحديّه ما تجيب إلا الحديّه
علّ غصن ما يجي ظلّه برادي
تقلع جذوره قبل يظهر خويّه
ألف علم وألف درب وألف وادي
كلمها مرت من البارح هنيّه
قصيدة ما فيه مثلك
غريب صادق وافي حيل كذاب
مدري انا بأي دروب اتجه لك
بخيل معطي مخطي حيل عتاب
لا جافى طبعك ولا زاد وصلك
البايع الشاري جحود وطلاب
يشكيك قلبٍ ما أحد فيه قبلك
ان جيت فدروب الحكي شفتك احباب
واعطيك كلي وانت ما قلت وش لك
لو قلت ابخفي شفت فعيون الاصحاب
انت الحبيب وكل شيء شهد لك
في حجر عينك صادق الشوق ما ذاب
تخفيه ليه وفرحتي سامرت لك
ما غاب فيك الحب لا لا ولاتاب
ادري انا اللي في خفوقك ونجلك
حنا الحبايب وادري الشوق ما شاب
ما فيه مثلي وانت ما فيه مثلك