قصيدة المعاناة
ياليل خبرني على أمر المعاناة
هي من صميم الذات ولا أجنبيه
هي هاجس يسهر عيوني ولا بات
أوخفقه تجمح بقلبي عصيه
أوصرخه تمردت فوق الاصوات
أو ونة وسط الظماير خفيه
أوعبرة تعلقت بين نظرات
أو الدموع الى تسابق هميه
أعانى الساعه وأعانى مسافات
وأعانى رياح الزمان العتيه
وأصور معاناتى حروف وابيات
يلقى بها راعي الولع جاذبيه
ولاني بندمان على كل ما فات
أخذت من حلو الزمان ورديه
هذي حياتي عشتها كيف ماجات
آخذ من أيامي وأرد العطيه
قصيدة أستكثرك
أستكثرك وقتي على وغدا بك
عادة زماني كل ما طاب هون
ليت الذي وداك يازين جابك
تشوف عقبك كيف الأيام سون
شرق مشيت وغرب وقتي مشابك
والقلب ماله لايمٍ فيك لو ون
عقب إلهنا بك ذاق لوعه عذابك
تلـونت دنيـاه ولا تلـون
طويتني طي الورق في كتابك
حتى معاليق الحشى لك تطون
اشتقت لأيام الهوى في جنابك
يوم الشموع بليل الأحباب ضون
واشتقت أقول لهاتفك مرحبا بك
واشتقت لغيوم الصحارى تكون
عود ترى داع الهوى عند بابك
وأروى القلوب الى بعد ماترون
غنيت لك عمري ولاجا جوابك
واسمي مع مجنون ليلى تدون
قصيدة يالله دخيلك
ستّل جناحه ثمّ حام يرقـى
علـى متـن الهـوى
يزفّه بعيـد ٍ
و أنـا محـدود فـي حـدّ النظـر
له بالهوى شف و مرام
يلعب مـع الغيمـة سـوا
ولاجناح ٍ لي و أطير
و الأرض صارت لي مقر
فكري تغشّاه العسام
أمسيت و فكري مـا ضـوى
الأرض كفر ٍمن الونس
و الليل من فرحي قفـر
طيري ضرب جوّ الهيام
ولو دعيتـه مـا ألتـوى
عزّي لمن طيره غدا
ولا لـه مـن أمـره مفـر
شبّيت ضوّي في الظلام
في صحصحٍ ذيبه عـوى
مالي أنيس إلا النجـوم
أو نـور وضّـاح القمـر
خالي وكنّي في زحـام قلبـي
تلهـب و أنشـوى
ما عاد أميّـز بالحشـا
ولا علـى ضـوّ الجمـر
وين أنت يا داعي سلام
وين أنـت يـا بايـع دوا
ردّوا لي النومـه تـرى
فالعيـن جـلاّد السهـر
دوّرت في الشدّه حـزام
ولا لقيـت اللـي قـوى
يالله دخيلك مـا لقيـت
اللـي نشـد بـه الظهـر
قصيدة سريت
سريت ليل الهوى لين انبلج نوره
امشي على الجدي وتسامرني القمرا
طعس وغدير وقمر ونجوم منثوره
انفاس نجد بها جرح الدهر يبرا
يا نجد الاحباب لك حدر القمرصوره
طفلة هلال وبنت اربع عشر بدرا
حبيبتي نجد عيني فيك معذوره
معشوقة القلب فيها للنظر سحرا
فضة شعاع القمر في نجد مسحوره
منشاف لمع قمر في خدة سمرا
قصيدة بنات الريح
من بنات الريح لي صفراجفول
كنها ظبي الفلا بجفالها
منوة الخيال عساف الخيول
زينها في دقها وجلالها
زينها ما شفت وصفه بالمثول
الله اللي بالجمال اصخى لها
تستذير كحيلتى من كل زول
ما يصخرها سوى خيالها
اذكر الله كل ما قامت تجول
و احمد الله خصنى بحبالها
كنها تمشي على قرع الطبول
فتنى اللي خافقه يبرى لها
ظافي القصه على الطرف الخجول
تنكسر شمس العصر بظلالها
وصفها وصف السحاب اللي يحول
كل عين تستخيل خيالها
او كما طاري على الخاطر عجول
صاحبه حقيقته ما طالها
كل رجل في حياته له ميول
والهوايه تمتلك رجالها