منتديات جمانة فلسطين - عرض مشاركة واحدة

اوسمتي · 09-27-2017, 11:10 PM

فزّ الخفوق وقلت يالله عسى خير
أثر الليالي عــــــاد غايب قمرهـــــا
مع شوفته نشوه و فزّه و تخدير
و عيون خلاّن(ن) تعانق نظرها
يفزّ له قلبي كما فزة الطيـــــر
و الرجل كن اللي تحتها غدرها
يا صبح عمري يا صباح التباشير
نوره ملا قلبي و روحي غمرها
عقب الفراق اللي تعدّى المحاذير
يبّس غصون القلب جافي دهرها
ربّع بروحي عقب ماهي معاسير
سحابة(ن) هلّت بقلبي مطرها
و اسقَى بها زرعة هوانا بتقدير
غرسة غرام (ن) بالمحبه بذرها
ياعاذلين العين والله مخاسير
واللي درَى عن حال عيني عذرها
تشوم عيني عن جميع الغنادير
و إن ناظرت عيني فوادي نهرها
يا ناس احبه و المحبه مقادير
هذا هوَى نفسي و هذا قدرها
و الحب ماله يا اهل الحب تفسير
قلبين و الله بالمحبه امرهـــــــــــا
لا جيت اصوّر حالة الحب تصوير
وأرد عن حــــــالي لخلّي خبرهـــــا
لقيت وجدي فوق كل التعابير
كل الشعر قطره و شوقي بحرها

قصيدة تستاهل الحب
تستاهل الحب نجديّه
رفيعة الشأن عجّابه
العين يا عين بحريّه
لقلوب الاحباب نهّايه
والجيد يا جيد ريميّه
تجفل من الزّول لعّابه
والرّيح يا ريح وسميّه
نبت الخزامي تثنَّى به
صفيت مع صافي النية
يوم الذي صابني صابه
معاد لي روحة أوجيه
وقف هوانا على بابه

قصيدة عنود الصيد
من خصايص عنود الصيد كثر الطواري
عادة الظبي يجفل لاتحرك ظلاله
ما يصيد الجوازي كود بخصٍ وضاري
القنص بالركاده والتسرع جهاله
ولايعرف الطرد من لايعرف الصحاري
ماتعرّض سموم ولاتعرض شماله
كلّ دربٍ عليه من المخاليق ساري
للسوالف رجال وللشكاله رجاله
وانت عشقة حياتي ياغزال البراري
أتفاول بوجهك سعد من صرت فاله
إنت والله حبيبي وإنت والله داري
إن نظرة عيونك يم غيرك جماله
ماانقطع سيل حبك بالمعاليق جاري
كنّ قلبي خلقه الله لحبك سباله
ليلتي ياقمرها ..غار منها نهاري
حيث وصل المودة همسةٍ في لياله
جعل واهج غرامك مثل وجدي وناري
مير ما اظن في دنيا المحبة عداله

قصيدة لايطول غيابك
لايطول غيابك ثم اخذ عليه
لو تخليت عنى عنك قلبي ماتخلى
العذر والتعلل والحكي مانبيه
من تحرك فؤاده بالهوى ماتخلى
طبعي الصبر لكن وش عليه ارتجيه
من طويل الصبر يعقوب وايوب ملا
دامني حي عطني وش بقي نحتريه
مابي دموعك اللي عقب موتي تهلا
مابقي بالعمر مقدر ماراح فيه
كل مازل يومٍ يوم بالعمر ولى
مايعرف الجمر مثل الذي يكتويه
احد يدفا بناره واحد فيه يتصلى
يامن القلب حطيته براحته يديه
مارضى له مكان غير كفك محلا
كم تعذر وعيا عن هوى مهتويه
لين طاح بيمينك بالغرام وتجلى

يتبع

واثـــ الخطوة ـــــق ,عاشق الذكريات معجبون بهذا