قصيدة يا صاح
ياصاح انا قلبى من الحب مجروح
جرح عطيب ما لقى له من يداوي
لو ينشرى قربه شريناه بالروح
مير البلا شوفه غدى به هقاوي
أهل دمع فوق الاوجان مسفوح
على الذى ما هو بللغدر ناوي
انا ادرى انه مثلي اليوم مطروح
لاشك ما يقوى و لاني بقاوي
لولاي ادارى سر الاحباب لا ابوح
وابيع بيعة الهبيل الفداوي
لكنى اجحد فيه عن كل مفضوح
خوفي عليه من الحكي و الدعاوي
حسبي على اللى حط فى الدرب ساموح
العذيل اللي جرّ كل البلاوي
من اول باب المواصيل مفتوح
يوم ان عذال المودة خلاوي
واليوم يسد الباب لوح(ن) على لوح
و امسيت انا يا صاح قلبى شقاوي
قصيدة ابي منها الخبر
أبي منه الخبر و يقول للّه
لفى المرسول ما عيَّن محلَّه
و قلبي تايه(ن) من عام الاوّل
ألا يا الله يسّر من يدلّه
خذاه اللّي على خدَّه علامه
سوادة غيم في شمس(ن) مطلّه
سرقني ما دريت انّه سرقني
سلبني و أحسب إني فاطن(ن) له
انا يوم أرسل عيونه لقلبي
عطيته مهجتي و المعطي الله
نصف زين الخلايق في عيونه
و باقي الزين في باقيه كلّه
قصيدة لا تلتفت
لا تلتفت يمّ خلق الله
ما احدٍ من الناس يشبه لك
الله عطاك الحلى كلّه
وتّقاسموا باقية فضلك
أنت القمر بين الأهلّه
نورك وجذّابك وشكلك
القلب برضاي محتلّه
لوتظلمه قلت من عدلك
قصيدة يا من سلامه
يا من سلامه لي هلا يا حبيبي
و الله هلا بك يا محبّة عيوني
هلا هلا يا لون شمس المغيبِ
يا نسمة الليل العطوف الحنونِ
يا بدر لا هلّيت لا عاد تغيبِ
ترى سواد الليل كحّل جفوني
انا دخيل الرّمش خلّك قريب
يا اللي بقربه كل شي يهونِ
قصيدة اذكريني
كل ما عانق نظر عينك قمر
او لثم خدك شعاع من غروب
او نسيم هفهف بشعرك سحر
او تغنى بالهوى صوت طروب
او تبلل كفك بقطر المطر
او تبسم بالسما نجم جنوب
او ضحك وردٍ على عودِ خضر
او نقل لك نفحة خزامي هبوب
او تهادى موج في شط البحر
ينشد الراحه بعد يوم تعوب
او خيال من قديم امسك حضر
يستفز القلب بالصوت العتوب
او تجاسر فكر في ليلة حذر
يسترد الحلم من درب الهروب
اذكريني واستعيديني شعر
صادق المعنى..ولو وقته كذوب
قصيدة افكاري
ركضت الحق الهارب ومتمرّد افكاري
ابا اروّض الفكره على حالي الجاري
ابا اقضب عنان الطامح الجامح العاصي
ابا المس حنان الساهم الحالم الساري
ابا اجمع شتاتي عقب رحلات غرباتي
واناغم هواجيسي على باكي اوتاري
تعبت –وجرحني يا اهل المعرفة-دربي
وطالت مسافاتي وانا اطارد افكاري
وراها توارى من ورا حاضر ايامي
وراها تسافر من ورا قدرة اسفاري
وراها تواري عجزي تشوفه عيوني
وراها تطير وكلي قيود واعذارِ
حبسني رماني بالثرى والسما حلمي
اغازل سحاباتي وانا اكتب لها اشعاري
اروّح لها صوتي مع رايح النسمه
واقول امطري ياغيمتي جفت انهاري
ويمسي علي الليل خالي وانا خالي
لا باح لي سرّه ولا بحت باسراري
نجوم السما تقدح وليلي بها ساكن
عجيب السكون بليل فيه الفلك جاري
ويافكري الهارب ويانوري الغارب
بدونك فراشاتي تهاوت على ناري
وانا لو عذرت الغير مااعذر افكاري
انا موطن افكاري ودار الفكر داري
قصيدة فدوة عيونك
فدوة عيونك لو غدت روح مغليك
وش عاد لو راحت لعينك عشاير
ابيع ما يغلى على الكون و اشريك
واسوق لَى جتني علومك بشاير
وازعّل جميع الناس بالحيل و ارضيك
و اصبر ولو دارت علَيّ الدّواير
وآخذ من ايّامي لك ايام واعطيك
وان راح عمري لك فلا هو خساير
احب انا شوفك و صوتك و طاريك
دايم وفكري فيك هايم وحاير
بالصمت اهوجس بك و بالصوت اناديك
والله عليم البيّنه و السّراير
انا و قلبي و الهوى بين اياديك
عندك مفاتيح الهنا للضماير
من روحي احبك ومن روحي افديك
يامن غرامه و الحسن فيه ثاير
يتبع