بعض قصائده الغزلية
( أنا والهوى غـبَـه )
تلاوعني الفرقا وانا ما اقبل اللوعه
ومن لاعته فرقا الحبايب بكي منها
يهج الحشا والجفن ماكفَـت دموعه
وابا اشتم محبة بعض الاصحاب وألعنها
عسى الله يروع اللي يسبب لي الروعه
متى الريح تحملني وأواطن بمواطنها
ومتى ربعي الغيَـاب تلتم بربوعه
واقبَـل خدود باسود الرمش دافنها
دقاقة ملامح تفرع البيض مربوعه
ومن حذقها في ردن ثوبك تكفَـنها
أولَـع شموع الوجد وأطفَي شموعه
أنا والهوى غبه وتلطم سفاينها
( كل ما ون قلبي جاوبنه الضلوع )
كل ماون قلبي جاوبنه الضلــوع
من هنوفٍ سلب عقلي هدب عينها
كن في عينها وإن ناضرتني جموع
حفرة الموت في مقرن حجاجينها
جاء نهار الخميس وفات يوم الربوع
والوعد طاف والاقدام مشقينــهـا
حفيت اقدامنا والعين تذرف دموع
فرقا الاحباب يومين ياشينـهـا
يا مليح الكلام ويا حسيين الطبوع
صورةٍ حابها الرحمن يازينــها
فيك من ضبي نجد اوصاف واحسن رموع
وانتم اللي كبــود الناس كـاوينــهـا
ضامر البطن ما مسة شقاوه وجوع
شجرةٍ عن سموم القيض حامينهـا
فوق جمنٍ قراح بين ذيك الزروع
ليت من ذاق من خضرة بساتينها
وان لحضني وانا امشي عن الدرب اتوع
هلت العيـــن واختلـت قـوانيـنـها
القدر نزلتني حدر تسعين بـوع
تحت هيبتك نعصا الروح ونهينها
يعجز اليوم قلبي من شبكم يزوع
شبكة اللي مكسرتن جناحينهـا
كل ما ون قلبي جاوبنه الضلـوع
من هنوفٍ سلب عقلي هدب عينها
( مونسٍ وسط عظم الساق شاظي )
مونس(ن) وسط عظم الساق شاظي
في عيوني من العبره مضيضه
لي يمينٍ عليه شهود ماضي
مانسيته ونسيانه غميضه
كيف ابا أنسا يمين عند قاضي
ينصف الحق ما واحد يغيضه
إن حكم لي بغير إرضاي راضي
ما خسر واحد(ن) ربي حفيضه
أتصبر وقلبي فيه لاضي
كيةٍ نيـه والاخرى نجيضه
لازمي لزمٍ واجب وحاضي
والدقيقة من الساعة فريضه
ضايقٍ بي فضا سبع الاراضي
من سبايبك ياغضه غضيضه
اشملوا به ولي عنده مقاضي
راح ماشاف وش علة مريضه
المحبه يابو سودٍ غواظي
ناب مغروس مايبري عضيضه
تنقض الحال وتقضه قضاضي
كان شفتك فـ أنا روحي حضيضه
آه يا من معك ملحوظ ياضي
لا دقاقه ولا انتي بالغليظـه
والجسد فيه من ريح الفياضي
عله الوسم واسترجع نقيضه
ان قـفيـته قصر عني وجاضي
وان نطحته معه بيضه وبيضه
(سلام وتحية)
سلام وتحيه / يالديره الحيه
يلي قضينا بك / أيام الاعياد
حضرن ضواحيها / والرب حاليها
ما كفها الضلع / والعرق والوادي
العلم مبداها / والعقل يرعاها
مصيونة العرض / من عصر الاجدادي
فيها حبيب إلي / بالود صافلي
أنا مراده / وهو غاية مرادي
عمري مشاركني / بالعطف مالكني
فيض وقيس / بعد حل بفوادي
غصبن لك المنه / ياحوري الجنه
إمحط في رجلي / عقال وقيادي
النوم حاربني / والسهر صاحبني
دمعي على خدي / أجواز وأفرادي
كفي على كفي / مجروح مخفي
اخاف من هرج / عاذل وحسادي
هذي سنه هجري / ولاجاني فجري
والبكر في بحر / الهواء غادي
ليلي مضى كله / وانا بطار إله
سيرة حبيبي / تغلق وتنعادي
يامعطي الحفنه / حرقت محامسنا
ينقص على اهل الهوى / بن وقنادي
شفقن على الغايب / قلبي منه ذايب
ذوب الحديد / ان تولاه حدادي
وجعان من حبه / وأرجي شفا طبه
والحب معروف / من عصر شدادي
لو صاحبي يدري / عن ماحوى صدري
من هم وحزون / وغبون وجهادي
ما كان يشقيني / البعد يكفيني
القلب مليان / ماعاد يزدادي
لو زاد يتكسر / جذعه ويتخسر
والشمل مافرقه / غير الابعـادي