03-06-2020, 02:29 PM
|
|
|
من باع ربعه با يبيعونه الناس
من باع ربعه با يبيعونه الناس
لو جاملوه أيام مبيوع مبيوع
ومن حط نفسه عبد بيدين نخاس
وأصبح تبوعه بعدما كان متبوع
اكيد ماعنده كرامه ولا إحساس
ويجيك حيث يوجهه سيده طوع
العز والشيمه لها قدر وقياس
ماهوب جمع أرزاق أو شل قربوع
واللي بدون أهله يبا رفعة الرأس
ماله بدون أهله سوى ذل وخنوع
العز هم ربعك وهم قوة الباس
اللي بهم دايم ولك رأس مرفوع
انا أشهد أن العرق بالفعل دساس
وعزي لمن عرقه في الذل مزروع
واللي تجذر عرقة بأرض نوماس
تثمر شرف لو كان يشكي من الجوع
ما ينهدم مبنى وهو ثابت الساس
وكلن على ساسه تقاليد وطبوع
والله يلعن كل خاين وبلاس
ليته تحت قامه من الطين مرزوع
وانا أشهد أن من باع ربعه على الناس
ولو جاملوه أيام مبيوع مبيوع
مساعد ابن هادي ابن ناصر الحارثي
20يناير2019م
|