ديوان خيل الفكر
قصيدة الحلم
الحلم انا .. مدري أنا الحلم
وانتي الحقيقه والمنام
وآه يا طول العنا
وكثر السؤال
لمرايتي من أنا
حبيبتي إذا طريتي بالخيال
اللي ابد .. لا ما نساك
ابنتظر لحظة جفاك
علها تسمح
وانساك يوم
ودي اعرف من أنا
حبيبتي أمس .. وانتي فجر باكر
يا فرحة اليوم
حبيبتي والله
منك تغار نجوم
لا صرتي القمرى
وفي عيني الشمس
سافرت فعيون الظلام
وقفت أبي بعض الكلام
اللي نساني .. مدري نسيته
وشفت المواني .. بذيك العيون
اللي نست موج البحر
مثلي أنا .. ناقصها شي
حبيبتي سافرت .. لجل انسا
وطيفك معي سافر
آسف .. كلك معي سافر
من المدامع للعيون
ومن الخواطر للخيال
وكنتي الحديث
بين الدفاتر والقلم
حبيبتي انتي نسيانك محال
لأنك انا
حبيبتي انتي الحلم .. انتي الحلم
قصيدة شط الأرق
مريت وعيونك بحر
واهدابها شط الأرق
وردت لأمواج العيون
والملح ما يروى ظما
فعيوننا باكر وعد
باكر ورى باكر غرق
شف باكر اللي ننتظر
في مهجة الياس ارتما
ناظر جفون البارحه
من خوفها نز العرق
تحكي عيوني ليلتي
لا صارت ادموعي دما
تمر فعيون الجراح
خل لخلانه درق
يضحك و هو يجرح بهون
و ان قلت له جرحي كما
انسى مثل باكر نسى
لا مرّه اليوم وشرق
نبدا مثل شمس النهار
ماهمها ليل العما
احتاج لك و انت الحبيب
اللي على بابي طرق
أنا الحبيب اللي دمحت
و انت الحبيب اللي رما
لك صاحبٍ يضماك شوق
وان جيت فعيونه شرق
من فرحته تنبت نجوم الليل
لا صرت السما
بالخير يا برق الغرام
اللي من البارح برق
تباشرت بك مهجةٍ
مدري تباشر بك غما
من امس لك طيفٍ مقيم
بين الخواطر والورق
يا مرحبا وانت الحديث
اللي على اوراقي نما
قصيدة ضاقت دروبك
ضاقت دروبك وين بالقاك خلّي
الشوق جابر واصدق العشق ذبّاح
بالله من لك وانت لولاك من لي
كانه صحيح فعطني الود وارتاح
بعطيك كل الحب يكفي تغلّي
ترى بصدر العشق حكي ولا باح
جمر الغضى صدري وهذا محلّي
وهذي دلال بالغلا هيلها فاح
قبلك وانا شوف المحبه تسلّي
وبعدك كتمت العشق والعشق فضّاح
وكاني جرحتك لو دقيقه فقلّي
ولا انتظر عينك ولا اسألك من راح
كن الوصل نجم تركته يصلّي
بين السما كنّه لهاليل مصباح
قصيدة ليل الموادع
أه ليل الموادع باول الصبح مدّو
وبين هاك المحاني للمحاجر كلام
ليه حنت ركايب حبنا يوم شدّو
ليه ما زهر حديثي يوم شليت خيام
الليالي تفرق مدري الناس صدّو
ويل عين المسافر لين حل العتام
ليتهم يوم مرو بالمعاليق لدّو
أجدبت كل نبته والمحاني حطام
ساترتني ثيابي والبلا يوم عدّو
شققوا صدر ثوبي واستباحو ظلام
يا عرب لي خفوق ردو القلب ردّو
صحت والعين نادت غاب بدر التمام
روحوا للسلامه يوم شدو ومدّو
وللموعد تحية وللموادع سلام