في رحلة الشوق وش ودك تسميني
شهيد هالحب ولا صرت مظنونك
وان جيت تسأل أنا في هالحكي ويني
نظرات عيني على حبك يدلونك
يا أنت مدري ولكن كنك سنيني
و الفرق في بسمتي بالقاك وبدونك
من حلمي اللي أحبه لا تصحيني
يا اجمل العشق واجمل منّه شجونك
تقول وش فيك وانا اقول وش فيني
ما فيني الا اني من سنين مجنونك
أحيان اهوجس وبالهاجس تلاقيني
يا انت حتى هواجيسي يعشقونك
قصيدة ما جابك الا
ما جابك الا هالخطى
ولا انت مبطي ما سألت
الله يسلم هالخطى
ما دامه اللي رجعك
لا ما زعلت ولا تخاف
أو تدري يمكني زعلت
بس الأكيد ان الضجر
كان فعيوني يجمعك
مبطي وانا هذا البطي
متعوده منك وقلت
طبعك وخفت اقول لك
طبعك وعيني تدمعك
ساعدني لو مره بطيح
من التعب مدري ذبلت
ساعدني أو قلي وش
اللي فالحقيقه يمنعك
والله مدري ويش اقول
اعرف ومن عرفي جهلت
أو هو الملل هذا خذا
قلبي وقفى يتبعك
فمرايتك الفين مره
في غيابك قد رحلت
وش رجعك قلبي ذبل
ومرايتك ما تسمعك
قصيدة البارحة والجروح كثار
البارحة والجروح كثار
والموت في هالهوى راحه
ان قلت لي ما سمعت اخبار
دوك اسمع القلب واجراحه
بعض الليالي لها تذكار
فالقلب يا نايد افراحه
تقول مدري وش اللي صار
وشلفاك بالصدر ذباحه
لي طير عندك عسى ما طار
قلبي كفخ حبه جناحه
يقول يا طوله المشوار
من خنجره لآخر اتراحه
لو للعمى مشعل من نار
وش ينفعه والعمى زاحه
تعبت واقف وكلش دار
والروح للبعد نزاحه
ذكرى عمر خلها وقدار
عذر ندور به الراحه
قصيدة كثر الحكي
كثر الحكي ما قصر الليل لو زاد
وياليت لو بعض السوالف يداوي
البارحة والشوق بالصدر وقاد
ووجه سهر في مهجة البعد ذاوي
واللي رحل ما فرح القلب لو عاد
وما عاد تفرق كان بالبعد ناوي
من قال في فرقى المحبين ميعاد
أو ديرة الفرقى للاحباب تاوي
ياللي جمالك نور وعيونك سهاد
عمر القمر ما حب لو كان ضاوي
قبل الرحيل اللي نبت هم وعناد
لا غاب حبك ويش قلبك يساوي
قصيدة ما طول الوقت
ما طول الوقت أو طول
الحب باقي وانا باقي
في محبتك مثلي من أول
يا ساكن باجمل أشواقي
تعال وارقى و لا تحول
بين المعاليق فاعماقي
لو كثر الحكي أو قلل
عنك سواليفه دقاقي
حكيت لك ليتك تكمل
لا صار في هالحكي باقي
لي خافق عله يجمل
لا راح لك بآخر أوراقي
يحكي معك وآقف اتأمل
لا قال لك حيل مشتاقي
الحب في صدره يهول
عسى ضلوع الهوى تاقي
باتحمل البعد و اتحمل
لا صرت بالقا وبتلاقي
قصيدة الخواطر كثيره
يا مطول الليل الخواطر كثيره
اتعبني الهوجاس واتعبني الليل
خليتني من بين ياس وحيره
طال انتظاري وانت طولت بالحيل
كل المشاعر في غيابك كسيره
انت بظلام العمر للعمر قنديل
عين تشوف وما تشوفك ضريره
عيد الغلا بعد العذاب المواصيل
جرحك حبيبي ما يجي مثل غيره
احتاج جرحك حاجة الأرض للسيل
للحب نشوة والليالي قصيره
يانور ليل الحب عذب التعاليل
الليل للعشاق دنيا كبيره
والصبر خطوة في دروب المقابيل