دورة تعليم التريكو

بسم الله الرحمن الرحيم

الدرس 6

الغرزة العدلة Knit Stitch

فى الدرس السابق شرحنا إزاى نبدأ سطر تريكو

بطريقة الغرزة البسيطة

وقبل مانبدأ درس النهاردة عاوزة أوضحلكم شوية

مفاهيم ممكن يكون ده الوقت المناسب علشان أذكرها

أولا

* أى عمل تريكو بيتكون من عدد من السطور

وكل سطر يتكون من عدد من الغرز

* وهناك أسلوبين فى شغل التريكو

الأسلوب الأول : وهو الشغل أمام وخلف العمل

(ويسمى أيضا الشغل المسطح)

ويعرف بالإنجليزية بإسم
Knitting Back & Forth
أو
Flat Knitting

وهذا الأسلوب اللى هنشرحه خلال كل دروس الدورة

وهذا الأسلوب يمكن عمله بإستخدام جميع أنواع

إبر التريكو(مدببة الطرف و مدببة الطرفين و الدائرية)

وفى هذا الأسلوب لعمل سطر جديد يجب أن

**نلف الشغل** وهو مصطلح يعرف بالإنجليزية

بإسم **Turn your work**

ونلف الشغل يعنى عند الإنتهاء من سطر لبدايه

سطر جديد نقوم بعكس إتجاه الشغل ونعاود الشغل

فوق الغرز السابق شغلها فى عكس الإتجاه يعنى

نبدأ فى السطر الجديد بشغل أخر غرزة مشغولة

فى السطر السابق وهكذا فى كل سطر جديد نقوم بلف الشغل

....

أما الأسلوب الثانى : وهو الشغل الدائري

(ويسمى أيضا بإسم الشغل الأنبوبي)

ويعرف بالإنجليزية بإسم
Knitting in the Round
أو
Circular Knitting
أو
Tubular Knitting

وهذا الأسلوب هنشرحه فى أخر الدورة لأنه

يختلف عن الأسلوب الأول فى مواضع كثيرة

وهذا الأسلوب يمكن عمله بإستخدام الإبر الدائرية

والإبر مدببة الطرفين ولكن لايمكن عمله

بإستخدام الإبر مدببة الطرف

وفى هذا الأسلوب لعمل سطر جديد لا نقوم بلف

الشغل بمعنى لانقوم بعكس إتجاه الشغل ولكن

يكون الشغل فى إتجاه واحد فى كل السطور

يعنى نبدأ فى السطر الجديد بشغل أول غرزة

مشغولة فى السطر السابق وهكذا فى كل سطر جديد

والكلام ده هيوضح أكثر أثناء دروس الدورة بس

حبيت أوضحلكم معنى كلمة لف الشغل لأننا

هنسمعها كتير أثناء شرح الدروس التالية

**طريقة مسك الإبرة والخيط**

_ طبعا كتير منكم هيقولوا طيب ليه الموضوع ده

مقولتهوش الدرس اللى فات أو اللى قبله ؟

لأن فى الدرسين اللى فاتوا كنا بنستخدم إبرة

تريكو واحده مع الإيد يعنى عقدة البداية عملناها

بالإيد وحطناها على إبرة واحده وكمان سطر

البداية عملناه بإستخدام إبرة واحدة واليد الشمال

أما من أول الدرس ده هنبدأ نشتغل بالإبرتين

فلازم نعرف إزاى نمسكهم

...........
وقبل ما أشرح إستايلات مسك الإبرة والخيط

عاوزة أقولكم إن مافيش إستايل معين فيهم صح

وإستايل غلط ولكن إنتى بتختارى المسكة اللى

بتريحك أثناء الشغل واللى بإستخدامها بتحسى

بسرعة فى الشغل وراحة وغير كده فى ناس

بتشتغل تريكو إخترعوا طرق كتير لمسك الخيط

والإبرة غير الإستايلات اللى هنشرحها دلوقتى

وكلها صحيحة طالما بتريحك فى الشغل وبتؤدى

فى النهاية نفس الغرض

..........

لمسك الإبرة والخيط إستايلين مصنفين عالميا

الإستايل الأول
---------------
الإستايل الإنجليزى أو الأمريكى
ويعرف بالإنجليزية بإسم
English knitting
أو
American knitting
أو
throwing
أو
right-handed

_ وهو الإستايل الأشهر بين مستخدمى التريكو

_ بنمسك خيط الشغل باليد اليمين بحيث يتخلل

الخيط بين الأصابع ويمكنك إستخدام اى اسلوب

لمسك الخيط بحيث تستطيعى التحكم فيه فليس

هناك طريقة مثلى لمسك الخيط فالأهم هو

إمكانيتك للتحكم فى الخيط

_ وبنمسك الإبرة اللى عليها الغرز باليد الشمال

والإبرة الفاضية(وتسمى إبرة الشغل working

needle) باليد اليمين

..............
الإستايل الثانى
---------------
الإستايل الأوروبى أو الألمانى
ويعرف بالإنجليزية بإسم
Continental knitting
أو
German knitting
أو
picking
أو
left-handed

_ وهو الإستايل الأقل إستخداما بين مستخدمى التريكو

_ بنمسك خيط الشغل باليد الشمال بحيث يتخلل

الخيط بين الأصابع ويمكنك إستخدام اى اسلوب

لمسك الخيط بحيث تستطيعى التحكم فيه فليس

هناك طريقة مثلى لمسك الخيط فالأهم هو

إمكانيتك للتحكم فى الخيط

_ وبنمسك الإبرة اللى عليها الغرز باليد الشمال

والإبرة الفاضية(وتسمى إبرة الشغل

working needle) باليد اليمين

.........

هنلاحظ إن الفرق الوحيد بين الطريقتين هو مسك

الخيط فى اليد اليمين للطريقة الإنجليزية ومسك

الخيط فى اليد الشمال فى الطريقة الأوروبية

ولاحظنا ان فى كلا الطريقتين إن الإبرة اللى

عليها الغرز دائما بتتمسك فى اليد الشمال

وبتكون ثابته وإن الإبرة الفاضية واللى بتسمى

إبرة الشغل لأنها هيا المتحركة دائما بتتمسك

فى اليد اليمين

.........

هناك البعض يستخدم الطريقتين فى وقت واحد

فى حالة إذا كان بيشتغل بلونين فبيمسك لون في

اليد اليمين ولون تانى فى اليد الشمال

.........

المهم مش عاوزة أطول عليكوا وزى ماقولتلكم

امسكوا الابر والخيط بالطريقة اللى تحسوا انكوا

مرتاحين فيها

والأن نأتى لنشرح درس اليوم

هناك غرزتين أساسيتين فى شغل التريكو وهما الغرزة العدلة والغرزة المقلوبة

بمجرد إنك تتعلمى الغرزة العدلة والغرزة المقلوبة يبقا قطعتى نصف الطريق فى شغل التريكو

وبإستخدام الغرزتين دول يمكن عمل أى شكل من أشكال التريكو المتنوعة

وقبل مانعرف إزاى نعمل الغرزة العدلة والغرزة المقلوبة لازم الأول نعرف شكل الغرزة على الإبرة بيكون إزاى

طبعا فى الدرس السابق عملنا سطر البداية واللى بيتكون من عدد من الغرز وكل غرزة بيكون ليها شكل على الإبرة إذا مسكنا الإبرة باليد الشمال ونظرنا إلى الغرز سنلاحظ أن الغرزة تتكون من لفة أمامية(Front loop) واللى بنكون شايفينها قدامنا ولفة خلفية (Back loop) واللى بتكون مستخبية خلف الإبرة

زى الرسم التوضيحى التالى

و شغلنا الاساسى فى التريكو بيكون بعمل الغرزة العدلة والمقلوبة فى اللفة الأمامية دائما (ولكن يمكن أيضا عمل غرزة عدلة وغرزة مقلوبة فى اللفة الخلفية ولكن فى هذه الحالة يجب أن يذكر الباترون ذلك)

...........

أيضا نلاحظ فى الرسم أن كل من اللفة الأمامية واللفة الخلفية للغرزة يتكون من جهة شمال وجهة يمين

..........

فى درس النهاردة هنتعلم الغرزة العدلة وإن شاء الله فى الدرس القادم هنتعلم الغرزة المقلوبة

والنهاردة هنتعلم 3 حاجات

1/ إزاى نعمل غرزة عدلة بالإستايل الإنجليزى

2/ إزاى نعمل غرزة عدلة بالإستايل الأوروبى

3/ إزاى نعمل غرزة عدلة فى اللفة الخلفية

الغرزة العدلة
(Knit stitch)

دى الغرزة الأساسية فى شغل التريكو وعشان كدا سمى شغل التريكو بإسمها The Knitting.

وزى ماشرحت فى أول الدرس إن فى إستايلين لمسك الخيط والإبرة وإنتى تختارى اللى ترتاحى فيه بس أنا هشرح طريقة عمل الغرزة العدلة بالإستايلين وفى النهاية الخطوات واحدة والنتيجة واحدة بس الإختلاف بيبقا فى طريقة مسك الخيط والإبرة

أولا

الغرزة العدلة بالإستايل الإنجليزى
Knit Stitch In English Style

(1)

هنمسك الإبرة اللى عليها الغرز فى اليد الشمال والإبرة الفاضية باليد اليمين وهنمسك الخيط باليد اليمين بحيث يكون الخيط خلف العمل

ثم هندخل رأس الإبرة اليمين فى أول غرزة على الإبرة الشمال هندخلها فى اللفة الأمامية من الشمال إلى اليمين ومن الأمام إلى الخلف كما موضح فى الرسم التخطيطى التالى

نلاحظ تكون حرف T أو X برأس الإبرتين وتكون الإبرة اليمين خلف الإبرة الشمال

(2)

بإستخدام اليد اليمنى هنقوم بلف الخيط حول الإبرة اليمين كالتالى هنمرر الخيط من أسفل الإبرة اليمين ثم هنلفه من شمال الإبرة اليمن ثم فوق الإبرة اليمين ثم إلى أسفل ونتأكد أن الخيط أصبح موجودا بين الإبرتين

(3)

بإستخدام رأس الإبرة اليمين مع وجود لفة الخيط حولها هنسحب الإبرة اليمين باللفة خارج الغرزة الموجودة على الإبرة الشمال إلى الأمام

هنلاحظ أن الإبرة اليمين أصبحت أمام الإبرة الشمال

(4)

هنسلت الغرزة الموجودة على الإبرة الشمال ولتصبح اللفة الجديدة موجودة على الإبرة اليمين وبكدا نقول مبرووك إنتى عملتى أول غرزة عدلة موجودة على الإبرة اليمين

(5)

هنكرر الأربع خطوات السابقة فى كل الغرز الموجودة على الإبرة الشمال حتى تنتقل كلها إلى الإبرة اليمين وينتهى السطر ولعمل سطر جديد هنبدل الابر يعنى الابرة اللى موجود عليها الغرز اللى هيا اليمين هنمسكها باليد الشمال والابرة اللى أصبحت فارغة اللى هيا الشمال هنمسكها باليد اليمين وده اللى بنسميه لف الشغل

ثانيا

الغرزة العدلة بالإستايل الأوروبى
Knit Stitch In Continental Style

(1)

هنمسك الإبرة اللى عليها الغرز فى اليد الشمال والإبرة الفاضية باليد اليمين وهنمسك الخيط باليد الشمال بحيث يكون الخيط خلف العمل

ثم هندخل رأس الإبرة اليمين فى أول غرزة على الإبرة الشمال هندخلها فى اللفة الأمامية من الشمال إلى اليمين ومن الأمام إلى الخلف كما موضح فى الرسم التخطيطى التالى

نلاحظ تكون حرف T أو X برأس الإبرتين وتكون الإبرة اليمين خلف الإبرة الشمال

(2)

بإستخدام سبابة اليد الشمال هنقوم بلف الخيط حول الإبرة اليمين كالتالى هنمرر الخيط من أسفل الإبرة اليمين ثم هنلفه من شمال الإبرة اليمن ثم فوق الإبرة اليمين ثم إلى أسفل ونتأكد أن الخيط أصبح موجودا بين الإبرتين

(3)

بإستخدام رأس الإبرة اليمين مع وجود لفة الخيط حولها هنسحب الإبرة اليمين باللفة خارج الغرزة الموجودة على الإبرة الشمال إلى الأمام

هنلاحظ أن الإبرة اليمين أصبحت أمام الإبرة الشمال

(4)

هنسلت الغرزة الموجودة على الإبرة الشمال ولتصبح اللفة الجديدة موجودة على الإبرة اليمين وبكدا نقول مبرووك إنتى عملتى أول غرزة عدلة موجودة على الإبرة اليمين

........
هنلاحظ إن الفرق الوحيد فى الإستايلين هيا الخطوة رقم 2 إننا فى الإستايل الإنجليزى بنلف الخيط باليد اليمين أما فى الإستايل الأوروبى بنلف الخيط باليد الشمال والنتيجة فى النهاية واحدة والخطوات واحدة وفى النهاية زى ماقولت حسب إرتياحك لمسك الخيط والإبرة فى ناس بتحب تشتغل بإيديها اليمين وناس بتحب تشتغل بإيديها الشمال

ثالثا

الغرزة العدلة فى اللفة الخلفية
Knit through the Back Loop

هيا نفس خطوات عمل الغرزة العدلة فى اللفة الأمامية الفرق الوحيد هو إتجاه إدخال الإبرة فى الغرزة

ففى الغرزة العدلة فى اللفة الأمامية
بندخل الإبرة اليمين فى اللفة الأمامية للغرزة من جهة الشمال ومن خلف الإبرة الشمال

أما لعمل الغرزة العدلة فى اللفة الخلفية
بندخل اللإبرة اليمين فى اللفة الخلفية للغرزة من جهة اليمين ومن خلف الإبرة الشمال

وإذا كان مطلوب عمل غرزة عدلة فى اللفة الخلفية سيطلب الباترون ذلك أما فيما عدا ذلك عندما يطلب الباترون عمل غرزة عدلة فقط فهو يقصد غرزة عدلة فى اللفة الأمامية

بسم الله الرحمن الرحيم

الدرس السابع



الغرزة المقلوبة

وتسمى بالإنجليزية

Purl Stitch

والغرزة المقلوبة هيا الغرزة الأساسية الثانية بعد الغرزة العدلة واللى شرحناها بالتفصيل فى الدرس السابق ولازم نعرف نفرق بينهم هما الإثنين

والنهاردة إن شاء الله هنتعلم 3 حاجات

1/ إزاى نعمل غرزة مقلوبة بالإستايل الإنجليزى

2/ إزاى نعمل غرزة مقلوبة بالإستايل الأوروبى

3/ إزاى نعمل غرزة مقلوبة فى اللفة الخلفية

...............

أولا

الغرزة المقلوبه بالإستايل الإنجليزى

Purl Stitch In English Style

ملاحظة(الكتابة باللون المختلف يوضح الفرق بين الغرزة المقلوبة والغرزة العدلة)

(1)

هنمسك الإبرة اللى عليها الغرز فى اليد الشمال والإبرة الفاضية باليد اليمين وهنمسك الخيط باليد اليمين بحيث يكون الخيط أمام العمل

ثم هندخل رأس الإبرة اليمين فى أول غرزة على الإبرة الشمال هندخلها فى اللفة الأمامية من اليمين إلى الشمال ومن الخلف إلى الأمام كما موضح فى الرسم التخطيطى التالى

نلاحظ تكون حرف T أو X برأس الإبرتين وتكون الإبرة اليمين أمام الإبرة الشمال



(2)

بإستخدام اليد اليمنى هنقوم بلف الخيط حول الإبرة اليمين كالتالى هنمرر الخيط من فوق الإبرة اليمين ثم هنلفه من يمين الإبرة اليمين ثم أسفل الإبرة اليمين ثم إلى أعلى ونتأكد أن الخيط أصبح موجودا بين الإبرتين



(3)

بإستخدام رأس الإبرة اليمين مع وجود لفة الخيط حولها هنسحب الإبرة اليمين باللفة خارج الغرزة الموجودة على الإبرة الشمال إلى الخلف

هنلاحظ أن الإبرة اليمين أصبحت خلف الإبرة الشمال




(4)

هنسلت الغرزة الموجودة على الإبرة الشمال ولتصبح اللفة الجديدة موجودة على الإبرة اليمين وبكدا نقول مبرووك إنتى عملتى أول غرزة مقلوبة موجودة على الإبرة اليمين



(5)

هنكرر الأربع خطوات السابقة فى كل الغرز الموجودة على الإبرة الشمال حتى تنتقل كلها إلى الإبرة اليمين وينتهى السطر ولعمل سطر جديد هنبدل الابر يعنى الابرة اللى موجود عليها الغرز اللى هيا اليمين هنمسكها باليد الشمال والابرة اللى أصبحت فارغة اللى هيا الشمال هنمسكها باليد اليمين وده اللى بنسميه لف الشغل

ثانيا

الغرزة المقلوبة بالإستايل الأوروبى
Purl Stitch In Continental Style

(1)

هنمسك الإبرة اللى عليها الغرز فى اليد الشمال والإبرة الفاضية باليد اليمين وهنمسك الخيط باليد الشمال بحيث يكون الخيط أمام العمل

ثم هندخل رأس الإبرة اليمين فى أول غرزة على الإبرة الشمال هندخلها فى اللفة الأمامية من اليمين للشمال ومن الخلف إلى الأمام كما موضح فى الرسم التخطيطى التالى

نلاحظ تكون حرف T أو X برأس الإبرتين وتكون الإبرة اليمين أمام الإبرة الشمال

(2)

بإستخدام سبابة اليد الشمال هنقوم بلف الخيط حول الإبرة اليمين كالتالى هنمرر الخيط من فوق الإبرة اليمين ثم هنلفه من يمين الإبرة اليمن ثم أسفل الإبرة اليمين ثم إلى أعلى ونتأكد أن الخيط أصبح موجودا بين الإبرتين

(3)

بإستخدام رأس الإبرة اليمين مع وجود لفة الخيط حولها هنسحب الإبرة اليمين باللفة خارج الغرزة الموجودة على الإبرة الشمال إلى الخلف

هنلاحظ أن الإبرة اليمين أصبحت خلف الإبرة الشمال

(4)

هنسلت الغرزة الموجودة على الإبرة الشمال ولتصبح اللفة الجديدة موجودة على الإبرة اليمين وبكدا نقول مبرووك إنتى عملتى أول غرزة مقلوبة موجودة على الإبرة اليمين

........
هنلاحظ إن الفرق الوحيد فى الإستايلين هيا الخطوة رقم 2 إننا فى الإستايل الإنجليزى بنلف الخيط باليد اليمين أما فى الإستايل الأوروبى بنلف الخيط باليد الشمال والنتيجة فى النهاية واحدة والخطوات واحدة وفى النهاية زى ماقولت حسب إرتياحك لمسك الخيط والإبرة فى ناس بتحب تشتغل بإيديها اليمين وناس بتحب تشتغل بإيديها الشمال
.......

ثالثا

الغرزة المقلوبة فى اللفة الخلفية
Purl through the Back Loop

هيا نفس خطوات عمل الغرزة المقلوبة فى اللفة الأمامية الفرق الوحيد هو إتجاه إدخال الإبرة فى الغرزة

ففى الغرزة المقلوبة فى اللفة الأمامية
بندخل الإبرة اليمين فى اللفة الأمامية للغرزة من جهة اليمين ومن أمام الإبرة الشمال

أما لعمل الغرزة المقلوبة فى اللفة الخلفية
بندخل الإبرة اليمين فى اللفة الخلفية للغرزة من جهة الشمال ومن أمام الإبرة الشمال

وإذا كان مطلوب عمل غرزة مقلوبة فى اللفة الخلفية سيطلب الباترون ذلك أما فيما عدا ذلك عندما يطلب الباترون عمل غرزة مقلوبة فقط فهو يقصد غرزة مقلوبة فى اللفة الأمامية

بسم الله الرحمن الرحيم

الدرس 8

غرزة الطوق

Garter Stitch

..........

أحبائى الجميلات قبل البدء فى درس النهاردة كالعادة عاوزة أدردش معاكم فى شوية أساسيات الأول علشان الصورة تبقا واضحة بالنسبة ليكم.

فى الدرسين السابقين شرحنا غرزتين أساسيتين فى شغل التريكو وهما الغرزة العدلة والغرزة المقلوبة وبالفعل إذا تمكنتى من عمل الغرزتين دول يبقا إنتى كدا قطعتى نصف الطريق فى تعلم التريكو .

عاوزة أتكلم معاكوا النهاردة عن

(عينة التريكو أو وحدة التريكو)

ومجازا يطلق عليها غرز التريكو وتسمى بالإنجليزية

Knitting Stitches

_ غرز التريكو أعداد وأشكال لامتناهية فلا يوجد إحصاء أو فهرسه عالمية لغرز التريكو .

_ ولكن عالميا غرز أو وحدات التريكو مقسمة إلى ثلاث مجموعات

1/ الغرز التى تتكون من تداخل الغرزة العدلة والغرزة المقلوبة (Knits & Purls)

2/ الضفائر (Cables & Arans)

3/ اللاسيه (Laces & eyelet)

والكلام ده هنتطرق إليه بشكل أوسع فى المستوى الثانى للمحترفين.

_ أى غرزة تريكو أو أى وحدة تريكو عبارة عن عدد معين من الغرز × عدد معين من السطور

**لكل وحدة من وحدات التريكو عدد غرز للبداية يجب الإلتزام به حتى تصبح الوحدة صحيحة الشكل فهناك وحدات يجب أن تبدأى بعدد غرز زوجى ووحدات أخرى يجب أن تبدأى بعدد غرز فردى ووحدات أخرى تبدأى بأى عدد من الغرز وهكذا (طبعا هتسألونى دلوقتى يعنى إحنا هنقعد نحفظ كل وحدة من الوحدات دى عدد غرز البداية ليها كام؟ لأ طبعا لو بتشتغلى من باترون بيذكر ليكى الوحدة بتفاصيلها أما لو كنتى بتشتغلى من غير باترون وعاوزة تنفذى وحدة معينة فى الشغل بتاعك بتكونى محتفظة بألبوم للوحدات دى بتفاصيلها ).

**أيضا كل وحدة تريكو تتكون من عدد معين من السطور فهناك وحدات تتكون من سطرين ووحدات أخرى تتكون من 4 أو 6 وهكذا لتحصلى على شكل الوحدة النهائى
وتلك السطور عبارة عن
1/ سطر البداية (الذى يحتوى على غرز البداية)
ثم
2/ السطور الأمامية (وهيا السطور الفردية زى السطر 1 و 3 و 5 و 7 وهكذا ) وتسمى Right-side rows وسميت بالسطور الأمامية لأنها تظهر من أمام العمل
ثم
3/ السطور الخلفية (وهيا السطور الزوجية زى السطر 2 و 4 و 6 و 8 وهكذا ) وتسمى Wrong-side rows وسميت بالسطور الخلفية لأنها تظهر من خلف العمل


_ أيضا أى غرزة أو وحدة تريكو يكون لها وجهان
1/ الوجه الأمامى ( يسمى أمام العمل وبالإنجليزية يسمى Right-side) ويتكون هذا الوجه من السطور الأمامية وهو الوجه الذى يكون ظاهرا للخارج كوجه القبعة الخارجى أو وجه البلوفر الخارجى وهكذا

2/ الوجه الخلفى ( يسمى خلف العمل وبالإنجليزية يسمى Wrong-side) ويتكون هذا الوجه من السطور الخلفية وهو الوجه الذى يكون مختفيا للداخل كظهر القبعة الداخلى أو سطح البلوفر الداخلى وهكذا

** والوجه الأمامى هو الوجه المميز للوحدة والذى يحتوى على تفاصيل الغرزة والذى يستخدم دائما ليصبح ظاهرا خارج العمل أما الوجه الخلفى فهو الوجه السئ ودائما يكون غير ظارها للخارج وهناك بعض وحدات التريكو وجهها الأمامى مماثل لوجهها الخلفى أى تظهر بنفس الشكل وتسمى reversible stitches وتكون هذه الوحدات مثالية لعمل البطاطين أو الشيلان أو أى عمل يمكن إستخدامه على الوجهين

..........

طبعا كل الكلام السابق هنشرحه بعد كدا بالتفاصيل المملة بس حبيت أذكره النهاردة للمبتدئين لأن درس النهاردة والدرس القادم هنتكلم عن وحدتين أو غرزتين اساسيتين من غرز التريكو وهنتطرق فيهم لكل تلك النقاط السابق ذكرها إن شاء الله