السيرة النبوية للاطفال ....الحلقة 1

	الحلقة العاشرة كان ياما كان و ما يحلي الكلام غير بذكر النبي ...هااا عليه الصلاة و السلااااااااام ..... ممتازين المسلمين سابوا مكة ... البلد الجميلة اللي فيها الكعبة ... و كانوا بيحبوها أوي .... بس سابوها غصب عنهم و سافروا الحبشة ....لييييه ؟ عشان الكفار ...الأشرار كانوا بيضايقوا و يعذبوا المسلمين ... عشان يخلوهم يعبدوا الأصنام .... و عاش المسلمين في الحبشة عند الملك الطيب اللي مش بيظلم ولا بيضايق حد اسمه إيه الملك ده؟؟؟ ..... اسمه النجاشي .... ملك الحبشة . بس الكفار الأشرار بعتوا اتنين منهم .... و معاهم هدايا حلوة كتييير للملك النجاشي عشان يرجع المسلمين ..... و إدوا الهدايا للملك و قالوله : "فيه ناس أشرار جم بلدك الحبشة ... خليهم يرجعوا معانا !!" ...قصدهم علي المسلمين الطيبين الملك كان طيب و عادل ...رد عليهم و قالهم : " لأ أنا مش هخلي حد يرجع معاكم ... عشان هما دخلوا بلدي خايفين و أنا لازم أحميهم ...و هجيبهم هنا و أسالهم عن كل حاجة " . فالملك جاب المسلمين ..... و سألهم : أنتوا ليه جيتوا عندي الحبشة ؟؟ و ليه سيبتوا أهلكوا في مكة ؟ ... قام جعفر .... جعفر بن أبي طالب .... أبن عم الرسول عليه الصلاة و السلام ...و قال : يا ملك ....أحنا في مكة كنا عايشن مع أهلنا ...و كنا كلنا بنعبد الأصنام .. و مكناش عارفين الصح .. و كنا بنعامل بعض وحش ...و محدش بيهتم بقرايبه ... و بنضايق جيرانا ...و القوي بيضرب الضعيف .... و بنظلم بعض لغاية لما جه سيدنا محمد ... الصادق الأمين ... النبي اللي ربنا أختاره ....و علمنا ...علمنا الصح ....و علمنا الخير .... خلانا نعرف أن الأصنام دي متقدرش تعملنا حاجة علمنا نعبد ربنا ...و ندعي ربنا ... عشان هو بس اللي يقدر يعملنا كل حاجة . علمنا نقول الصدق ... علمنا يبقي عندنا أمانة و نحافظ علي حاجة بعض ... علمنا نحب قرايبنا و نسأل عليهم ..... علمنا نحب جيرانا و نساعدهم ... علمنا ما نأذيش الضعيف ولا اليتيم و نحافظ علي مشاعرهم و نحبهم و نساعدهم ... فسمعنا كلام سيدنا محمد ... و آمنا بيه .... لكن الكفار اللي لسه بيعبدوا الأصنام .... أذونا و عذبونا عشان يخلونا نرجع نعبد الأصنام بتاعتهم ... فجينا عندك الحبشة لما عرفنا إنك ملك عادل ... و مش بتظلم حد ...و بتدي كل إنسان حقه . فالملك بص لجعفر ...و قاله : قولي كلام ربنا ...القرآن .... اللي سيدنا محمد علمهولكوا . جعفر قاله حاضر و فضل يقرأ قرآن " سورة مريم " . الملك الدموع نزلت كتير من عينه ... عيط عشان اتأثر بكلام ربنا ... و قال للمسلمين : أنا مش ممكن أسلمكم للكفار أبدا .... أنتوا هتفضلوا عايشين عندي في الحبشة في أمان ... و محدش من الكفار هيقدر يضايكوا و أنتم عندي فرجع الكفار لمكة ... و هما حاسين إنهم متغاظين أو اللهم صل علي سيدنا محمد

	الحلقة الحادية عشر كان ياما كان .... و ما يحلي الكلام ... إلا بذكر النبي عليه الصلاة و السلام .... ........... الممتازين يقولوا .......... عليه الصلاة و السلام .... الكفار رجعوا من الحبشة متغاظين .... و قالوا ما ينفعش كده ... لازم نفكر في خطة جديدة ....نؤذي بيها المسلمين .... قعدوا مع بعض ....و فضلوا يفكروا ..... نعمل إيه ؟؟؟؟ ...... نعمل إيه؟؟؟؟؟ .....ممممم .... فواحد شرير منهم قال : " أيوااااااا ... أنا عندي فكرة !!! لسة فيه شوية مسلمين في مكة .... و كمان الرسول و أهله لسه في مكة ... إيه رأيكوا ما نبعتش ليهم أي أكل ... لغاية لما يموتوا من الجوع ... و ما نشتريش منهم أي حاجة ... ولا نكلمهم ....ولا نقعد معاهم ... ولا نتجوز حد منهم .... و نخاصمهم .... و نفضل كده لغاية لما يبطلوا يصلوا لربنا ... و يرجعوا يعبدوا الأصنام تاني .... ساعتها بس نصالحهم و نرجعهم أصحابنا " الكفار الأشرار ...قالوا :" فكرتك دي ممتازة ... يلا نكتب الاتفاق ده علي ورقة ... و نعلق الورقة دي علي الكعبة ... عشان كل الكفار يشوفوه و يعملوا الخطة دي ! " فكتبوا الاتفاق الشرير بتاعهم في ورقة .... و راحوا علقوه علي الكعبة .... يااااااااااه .... المسلمين راحوا يشتروا أكل ... الكفار ما رضوش يكلموهم ... ولا رضوا ييدوهم أي أكل .. و الكفار كمان اتفقوا ما يشتروش حاجة من عند المسلمين عشان ما يخلوش المسلمين يكسبوا فلوس ... الأكل بقي عند المسلمين قليل أوي ... و جسمهم ضعف .... ...ولما بقوا يجوعوا أوي ...كانوا يروحوا ياكلوا ورق الشجر .... ساعات كان فيه ناس بييجوا من بره مكة يبيعوا ... فكان المسلمين يروحوا يجيبوا أكل شوية صغيرين في السر و لما واحد مسلم يعرف يجيب أي أكل كان يقسمه علي أخواته المسلمين ... لأن المسلمين أخلاقهم طيبة و بيحبوا بعض .... فضل المسلمين كده 3 سنين .... 3 سنين بيجيبوا أكل بصعوبة ... و بياكلوا قليل اوي لغاية لما جسمهم ضعف بس قالوا ... احنا مش هيهمنا ... مهما الكفار يعملوا هنفضل نحب ربنا ... و نعبد ربنا ... عشان ندخل الجنة ....اللي فيها أحلي أكل .... أكل الجنة أحلي من كل أكل الدنيا .... فضلوا مستحملين ... رغم التعب .. والجوع عشان عارفين ان هما الصح وهما الحق .. قالوا حتي لو تعبنا من الجوع ... مش هنرجع مع الكفار ... حتي لو جسمنا بقي ضعيف ... قلوبنا هتبقي قوية عشان احنا الحق .. حتي لو موتنا ... هنبقي احنا الفايزين .. عشان احنا اللي ربنا هيدخلنا جنته عشان صبرنا و استحملنا مفيش ولا واحد ... ولا وااااحد من المسلمين استسلم الا واحد منهم رجع للكفار و سمع كلامهم !! المسلمين كانت اجسامهم ضعفت .. بس قلوبهم قوية ... لانها بتحب ربنا . الكفار حسوا انهم فشلوا و انهم اتهزموا ... لغاية في يوم من الأيام ... جه 5 رجالة من الكفار ... و قالوا :"الاتفاق ده فكرة وحشة ... و مش هنخلي المسلمين يرجعوا للأصنام برضه ... .............احنا هنروح نقطع الاتفاق ده .... ده اتفاق فاشل ... " بس جه كافر شرير اسمه أبو جهل و معاه كفار تانيين .... قالوا لأ إحنا هنفضل علي الخطة دي ... وفضلوا يتخانقوا مع بعض لغاية لما سيدنا محمد شافهم ...و قال لعمه أبو طالب .... خليهم يشوفوا ربنا عمل ايه في الورقة اللي كتبوا فيها اتفاقهم ... ربنا خلي نمل الأرض ياكلها... أبو طالب عم الرسول سأل سيدنا محمد : انت عرفت منين ؟؟ فسيدنا محمد قاله : ربنا خلي جبريل عليه السلام يعرفني. راح الكفار بسرعة عند الكعبة بصوا في الورقة بتاعتهم ..... لقوا النمل اكل الورقة كلها ....إلا كلمة "بسمك اللهم " الكفار عرفوا إن ربنا هو اللي عمل كده في اتفاقهم الشرير ..... فخافوا ... و قطعوا التفاق بتاعهم .... و رجعوا يشتروا و يبيعوا من المسلمين تاني .... اللهم صل علي سيدنا محمد .

	الحلقة الثانية عشر كان يا ما كان و ما يحلي الكلام إلا بذكر النبي عليه الصلاة و السلام بأحلي وأعلي صوت هنقووووول ..... عليه الصلاة و السلام. الكفار الأشرار كل شوية يعملوا خطط جديدة عشان يؤذوا المسلمين ..... لكن.... كل يوم ناس جديدة تسمع كلام سيدنا محمد ... وتعرف إنه النبي اللي ربنا أختاره و يعلمهم يعبدوا ربنا ... و يعلمهم الأعمال الطيبة الصالحة و الخير و يبقوا مسلمين طيبين .... و الكفار هيتجننوا ... نفسهم يضايقوا سيدنا محمد بأي طريقة عشان الناس تفضل تعبد الأصنام .... بس عمه أبو طالب كان دايما بيدافع عنه ... و مش مخلي الكفار يعرفوا يعملوا فيه أي حاجة .... ومين كمان ؟ و السيدة خديجة كمان ... كانت أخلاقها أحسن أخلاق ... و كانت بتدافع عن سيدنا محمد و بتحبه ... و لما الكفار يضايقوه ...كانت تقوله ما يزعلش لأنها عارفة إنه هو النبي اللي ربنا اختاره ...وهو الصح ... وربنا هيخليه يكسبهم في الآخر بس السيدة خديجة تعبت اوي ..... ياااااااه... ده سيدنا محمد كان بيحبها أوي .... بس تعبها زاد ... و ماتت الرسول عليه الصلاة والسلام زعل وحزن أوي .... بس جبريل عليه السلام قال لسيدنا محمد ...إن ربنا عمل للسيدة خديجة بيت جميييييل في الجنة .... أحلي من كل البيوت الحلوة اللي في الدنيا .... وكمان عمه أبو طالب بقي راجل عجوز أوي ... و فضل عيان لغاية لما مات .... ياااااااه ... ده عمه اللي رباه و كان بيحبه و بيدافع عنه ... سيدنا محمد بقي حزين و وحيد ... ماتت السيدة خديجة .... و مات عمه أبو طالب الوقت ده اسمه عام الحزن .... و الكفار بقوا فرحانين إن عمه أبو طالب مات و السيدة خديجة ماتت و بقي مفيش حد من قرايبه هيدافع عنه و يحميه . فالكفار قالوا دلوقتي بس هنقدر نؤذي النبي و هو وحيد ومحدش هيدافع عنه فرجع الكفار يضايقوا سيدنا محمد ....و يعملوا تصرفاتهم الشريرة ... فسيدنا محمد فكر ..... فكر أنه يروح بلد اسمها الطائف جنب مكة .... عشان ممكن يعلم الناس هناك في الطائف الإسلام و يبقوا مسلمين طيبين و يعيش معاهم بعيد عن الكفار ... فراح سيدنا محمد الطائف و معاه ولد صغير اسمه زيد ابن حارثة ... زيد بيحب النبي و بيساعده و بيخدمه .... راحوا سوا لملوك الطائف .... كانوا 3 ملوك ... سيدنا محمد قالهم إنه النبي ... و قالهم يعبدوا ربنا ... و يسيبوا اللأصنام المصنوعة من الحجر .. اللي مش بتشوف ولا تسمع ولا تفهم ولا تقدر تعمل حاجة . بس ملوك الطائف طلعوا ملوك أشرار و مارضوش يسمعوا كلام سيدنا محمد .... و عايزين يفضلوا يعبدوا الأصنام ... و قالوله حتي لو أنت النبي اللي ربنا أختاره برضه مش هنكلمك!! سيدنا محمد قالهم :خلاص .. بس ما تقولوش للكفار اللي في مكة إني جيت عندكوا ... الملوك الأشرار قالوله :لأ ... هنقولهم و هنؤذيك زيهم !! الملوك الأشرار جمعوا الولاد الوحشة و قالولهم يرموا طوب علي سيدنا محمد ... الملوك دول ربنا هيدخلهم النار لأنهم أذوا النبي و مرضوش يتعلموا كلام ربنا .... سيدنا محمد هرب منهم بسرعة و معاه زيد ... و سيدنا محمد رجله اتعورت و زيد راسه اتعورت . ودخلوا بسرعة جنينة ... جنينة مليانة عنب ... و الولاد الوحشين بقوا مش شايفين سيدنا محمد و مشيوا ... سيدنا محمد قعد تحت شجرة العنب ... و فضل يدعي ربنا ... و قال لربنا : يا رب أنا ضعيف من غيرك ... يا رب ما تسبنيش يا رب أنا أهم حاجة عندي ما تكونش غضبان عليا ...و تكون راضي عني .... و فضل يدعي ربنا كتير ... الدعاء : (( اللهم إني أشكو إليك ضعف قوتي, وقلة حيلتي , وهواني على الناس , أنت ارحم الراحمين , ورب المستضعفين , وأنت ربي , إلى من تكلني ؟ إلى قريب يتجهمني , او إلى عدو ملكته أمري , إن لم يكن بك علي غضب فلا أبالي , غير أن عافيتك هي أوسع لي , أعوذ بنور وجهك الذي أشرقت له الظلمات , وصلح عليه أمر الدنيا والآخرة , أن ينزل بي غضبك , أو يحل بي سخطك , لك العتبى حتى ترضى , ولا حول ولاقوة إلا بك )) و بعدين أصحاب الجنينة كانوا رجلين .... شافوا سيدنا محمد من بعيد قاعد جوة الجنينة بتاعتهم .... فجابوا طبق و حطوا فيه عنب و قالوا لخادم عندهم ياخد العنب لسيدنا محمد عشان ياكل .... سيدنا محمد بص للعنب ...و قبل ما ياكل راح قايل :" بسم الله " الخادم استغرب ... وقال لسيدنا محمد : أنت بتقول كلام جميل قبل الأكل ...وفي البلد دي محدش بيقول كده سيدنا محمد سأل الخادم : أنت منين ؟ و بلدك اسمها إيه؟ الخادم قاله :بلدي إسمها نينوي ( تقرأ زي نيناوا ) سيدنا محمد قاله : أنت من بلد نبي كان اسمه يونس الخادم أستغرب و قال : أيوة صح أنت عرفت يونس النبي منين؟؟؟ سيدنا محمد قاله : يونس كان نبي و أنا كمان نبي من عند ربنا .. الخادم مسك إيد سيدنا محمد وباسها.. و وطي يبوس رجله المجروحة ... عشان عرف إنه رسول من ربنا . سيدنا محمد خرج من جنينة العنب و معاه زيد ... و رجعوا مكة .... قبل لما يدخل مكة ... جه سيدنا جبريل لسيدنا محمد و قاله : ربنا أرسلني و معايا ملك تاني ... لو تحب نوقع الجبال علي الكفار اللي بيؤذوك ... هنوقعها عليهم . سيدنا محمد قاله : لأ ... حتي لو هما كفار و أذوني ربنا ممكن يخلي أولادهم يبقوا مسلمين طيبين بيعبدوا ربنا وبس . سيدنا محمد وقف عند مكة و قبل لما يدخلها ... نده واحد من أهل مكة اسمه " مطعم بن عدي " ...و سأله ممكن تحميني من أشرار الكفار؟؟ "مطعم بن عدي" كان برضه بيعبد الأصنام بس مكنش بيؤذي النبي قاله أيوة .... أقدر ... و محدش منهم هيقدر يؤذيك .. ربنا هو اللي خلاه يوافق عشان يحمي النبي و راح مطعم نده علي كل ولاده ... و خلاهم يجهزوا كل أسلحتهم ... عشان يحموا النبي و يخلوه يدخل مكة من غير ما حد من الأشرار ما يقدر يؤذي سيدنا محمد ... دخل سيدنا محمد مكة و صلي عند الكعبة .. و دخل بيته .... و الأشرار من الكفار متغاظين و مش عارفين يعملوا ايه اللهم صل علي سيدنا محمد و علي آله و صحبه و ارزقنا حبك وحب نبيك .

	الحلقة 13 و ما يحلي الكلام غير بذكر النبي ......... و حبابيبي دايما بيقولوا .....عليه الصلاة و السلام ... طب الحلوين يقولولي : سيدنا محمد لما آذوه الأشرار في الطائف عمل إيه ؟؟ دعا ربنا ... ممتازين قال لربنا ... يا رب مهما آذوني ..أهم حاجة عندي ما تكونش يا ربي غضبان عليا و تكون راضي عني .... ربنا ما سابش سيدنا محمد ... وطمن قلبه ... إنه راضي عنه و بيحبه و هيخليه يشوف حاجات محدش غيره شافها ...هيحصل حاجة اسمها الاسراء و المعراج ... دي رحلة ربنا هيخلي سيدنا محمد عليه الصلاة و السلام يعيشها (يروحها) عشان يبقي ثابت و قوي و يعرف إن ربنا أختاره و ميزه عن كل الناس . و ما يزعلش أبدا مهما الكفار آذوه أو ضايقوه أو حاربوه ....و يبقي متأكد إنه ربنا معاه و هينصره . .... و هيحصل الإسراء و المعراج ... يعني إيه؟ ... الإسراء .... (من مكة إلي المسجد الأقصي) : سيدنا محمد صلي و بعدين نام (كانت الأول صلتين في اليوم) .... جه الملاك جبريل عليه السلام و صحاه .... و أخده عند الباب .... سيدنا محمد لقي كائن ....أول مرة يشوفه ... لونه أبيض... و عرف من جبريل عليه السلام إن اسمه البراق .... ربنا زي ما خلقنا و خلق الحيوانات و خلق كل حاجة ... خلق كمان كائنات و مخلوقات ما نعرفهاش ... ويقدر يخلق (يصنع ) ما يشاء .... ربنا قدرته كبيرة .. و أكبر من تفكيرنا ... سيدنا محمد ركب البراق ... بس مكنش البراق زي حيوانات الدنيا .... كان بيتحرك بأسرع سرعة ممكن نتخيلها ... اتحرك بسرعة من مكة ........لبلد بعييييييييييد ....اسمها القدس .... في الطريق سيدنا محمد شاف الناس اللي بتسافر لمكة و راكبين الجمال.... وماشيين بالراحة بالراحة ... و قدامهم جمل لونه قريب من الأسود وفيه بياض خفيف . و علي ضهره شايل كيسين (شنطتين) ،،، واحدة لونها اسود،،،، و التانية اسود في ابيض. و لقي جمل تاني ضايع منهم و قاعدين يدوروا عليه ... قالهم علي مكانه .... هما ما لحقوش يشوفوا سيدنا محمد ...بس سمعوا صوته و بعدين بعد شوية سيدنا محمد لقي ناس نايمة جنب ماية و متغطية ... فسيدنا محمد وقف شرب الماية .. و غطاها تاني لغاية لما وصلوا عند القدس ووقفوا عند المسجد الأقصي ............يااااااا اه .... المسجد الأقصي ده المسلمين كلهم بيحبوه أوي ....... (دلوقتي اليهود حاربونا و أخدوه مننا ... بس إحنا إن شاء الله هنحاربهم و نرجعه تاني عشان ده مسجد المسلمين ) سيدنا محمد نزل من البراق ... وربطه عند حيطه ... اسمها حائط البراق و دخل المسجد ....لقي إيه ؟؟؟ لقي الأنبياء اللي ربنا أختارهم ... و وقفوا يصلوا كلهم لربنا... و بعد لما خلصوا صلاة ... جبريل عليه السلام حط قدام سيدنا محمد 3 كوبايات واحدة فيها لبن ... وواحدة فيها خمرة وحشة ... وواحدة فيها ماية ... سيدنا محمد فهم قصد جبريل عليه السلام .... عرف إنه المفروض يختار الصح مد إيده وخد كوباية اللبن ... سيدنا جبريل قاله أنت اخترت الصح ...(الفطرة) عشان كده المسلمين لازم يتعلموا يختاروا في حياتهم الصح والنافع ... و اللي يقوينا و نبعد عن الي مش مفيد او اللي بيضرنا . وبعدين خرج سيدنا محمد و جبريل سيدنا محمد عرف إن هيحصل المعراج .... يعني ربنا هيطلعهم في السما ربنا خلق سبع سموات وكل النجوم والكواكب والشمس في سما الدنيا ..... و السموات التانية منعرفش عنها حاجة ربنا بس اللي يعرف كل حاجة . ربنا بيحب سيدنا محمد و هيخليه يشوف و يتعلم حاجات محدش غيره هيشوفها ولا يعرفها . و سيدنا محمد هيعلمها لكل الناس . طلعوا في اول سما ... لقوا ملايكة كتير مبتسمة و بتسلم علي سيدنا محمد و لقوا سيدنا آدم عليه السلام..... أول واحد ربنا خلقه .. يعني أبو البشر كلهم ... و سلم علي سيدنا محمد وصلوا تاني سما ....لقوا النبي عيسي عليه السلام... و النبي يحي عليه السلام ....سلموا عليهم . وصلوا تالت سما .... لقوا نبي شكله أجمل شكل .... ده النبي يوسف عليه السلام. وصلوا رابع سما .....كان فيها النبي إدريس عليه السلام. وصلوا خامس سما ....لقوا راجل شعره أبيض و دقنه بيضة ...بس مش عجوز أوي .... دي النبي هارون عليه السلام ...أخو موسي عليه السلام. وصلوا سادس سما .... لقو النبي موسي عليه السلام... أخو هارون عليه السلام . لغاية أخيرا ...سابع سما ....لقوا سيدنا إبراهيييييم عليه السلام .... يااااه ده سيدنا إبراهيم اللي دعا ربنا أنه يختار نبي يعلم الناس كلها ... سيدنا إبراهيم رحب بسيدنا محمد و قاله :مرحبا بالابن الصالح ...و العبد الصالح بعد كده جبريل خلي سيدنا محمد يشوف الجنة .... و سيدنا محمد قالنا إن إحنا مش هنعرف نتخيلها لأنها هتكون دايما أحلي من كل أفكارنا ... و إن لو إحنا عايزين أي حاجة في الجنة .... ربنا بيديهلنا و بتكون أحلي كمان . (لهم مايشاؤون فيها ولدينا مزيد) و احلي كمان من كل الصور ... و بعدين طلعوا من الجنة .... و شافوا ملاك مش بيبتسم ابدا ... سيدنا محمد عرف إن ده ... اسمه مالك ... ملاك النار و شاف النار و بيتعذب فيها الأشرار اللي كانوا بيعذبوا الطيبين المؤمنين في الدنيا و بيقتلوهم و يقتلوا أطفالهم و مش بيرضوا يسمعوا كلام ربنا ولا يصلوا لربنا . و وصلوا لمكان اسمه سدرة المنتهي ... مكان يشبه الشجرة .... بس أوراقها كبيرة جدا جدا ..... و هناك عند سدرة المنتهي .... سيدنا محمد سجد لربنا عشان ربنا اختاره أنه يكون الوحيد اللي يوصل للمكان ده ... و شكر ربنا و حمده ... ربنا قال لسيدنا محمد إن المسلمين يصلوا 50 صلاة .... (ممكن يسألك ...هو سيدنا محمد شاف ربنا؟؟ ... لأ سيدنا محمد ما شفش ربنا بعينيه ربنا قال ... لا تدركه الأبصار وهو يدرك الأبصار وهو اللطيف الخبير....) و بعدين سيدنا محمد رجع ...فشافه سيدنا موسي ... فسأله : ربنا أمرك تصلوا كام؟ سيدنا محمد قالوا : 50 صلاة ... سيدنا موسي قاله : ارجع ... و أسأل ربنا ... ممكن يقللها ... فرجع سيدنا محمد و طلب من ربنا يقللها فربنا قللها 5 .....فبقت 45 صلاة . فرجع سيدنا محمد لسيدنا موسي ... فسيدنا موسي قاله يرجع لربنا تاني عشان يقللها كمان.... فرجع لربنا و ربنا قللها كمان .... و فضلوا كده ... لغاية لما ربنا خلاها 5 صلوات ... سيدنا موسي قال لسيدنا محمد ...ارجع لربنا عشان يقللها كمان .... بس سيدنا محمد قالوا أنه ما يقدرش يطلب من ربنا أنه يقللها أكتر من كده ... لأن سيدنا محمد استحي (اتكسف) من ربنا . بس سيدنا محمد قالنا إن اللي هيصلي الخمس صلوات ربنا هيحسبهم كأنهم 50 صلاة عشان ربنا بيحب اللي بيصلوا و عشان يدخلنا الجنة .....ياااارب. ورجع سيدنا محمد لمكة .... كان لسه الدنيا ضلمة في مكة ... ولسه الفجر ما طلعش ... بعد ما سيدنا محمد صلي الصبح .... طلع عشان يحكي لأهل مكة علي اللي حصل طبعا بقوا مستغربين .... الكفار قالوا له :ده احنا عشان نروح أي مكان بنركب جمل...و بنفضل مسافرين شهر و بنرجع في شهر ... إزاي تروح وترجع في نفس اليوم .... طب قولنا دليل ! فسيدنا محمد قالهم .... في الطريق شوفت الناس اللي مسافرين لمكة و راكبين الجمال و فيه جمل ضاع منهم ...و أنا نبهتهم لمكانه .... و أنا عارف وصلوا لغاية فين...و كمان هما قربوا يوصلوا مكة و قدامهم جمل لونه أسود و فيه بياض خفيف ...و علي ضهره شنطتين صوف،،، واحدة سودة والتانية اسود في ابيض . و كمان كان فيه ناس تانية نايمين .... فلما عطشت وقفت ...و شربت من الماية اللي جنبهم و غطتها تاني . فراحو بسرعة أهل مكة يستنوا الناس اللي كانت مسافرة علي الجمال .... عشان يسألوهم أول لما وصل المسافرين .... أهل مكة استغربوا ... لقوا كلام سيدنا محمد صح فعلا جمل لونه أسود وفيه بياض خفيف ماشي قدامهم و حاطين شنطتين صوف علي ضهره ،، واحده سودة و التانية ابيض في اسود !! فسألوهم أنتم ضاع منكم جمل ؟ فالمسافرين قالوا أيوة ...بس سمعنا صوت حد بيعرفنا مكانه ولقيناه.. فلما جه ناس تانية مسافرين برضه ....أهل مكة سألوهم ... قالوا أيوة إحنا نمنا جنب ماية متغطية ...و لما صحينا لقينها متغطية برضه ....بس الماية لقيناها خلصانة. رجع الكفار لسيدنا محمد ... و قالوله إحنا فينا ناس راحت المسجد الاقصي قبل كده ... قولنا شكله إيه عشان نعرف إنت روحت فعلا ولا لأ .... سيدنا محمد فضل يوصفه بالتفصيل ...و ربنا خلي شكل المسجد يبقي قدامه عشان يعرف يرد علي كل أسألتهم ... ففضل سيدنا محمد يوصف أبوابه و شكله و كل حتة فيه !!! .... ورجع سيدنا محمد بيته و جه جبريل و علمه الوضوء و الصلوات الخمسة . والكفار رجعوا بيوتهم و بقوا هيتجننوا !! إزاي سيدنا محمد عرف كل ده ؟؟ و بقوا مستغربين .... عارفين مستغربين ليه ؟.... عشان الكفار ما يعرفوش إن ربنا يقدر يعمل كل حاجة و أي حاجة ... و إن ربنا هو اللي خلقهم و خلق عقولهم ... و مهما فكروا بقدرة ربنا بعقلهم .... أكيد قدرة ربنا أكبر من عقلهم.... ما يعرفوش إن ربنا مجرد يقول " كن " ...كل شيء هيكون ... زي ما ربنا أراد. اللهم صل علي سيدنا محمد .... اللهم ارزقنا حبك و رضاك ...

	الحلقة 14 كان يا ما كان و ما يحلي الكلام إلا بذكر النبي عليه الصلاة والسلام ولادي حبايبي دايما لما بيسمعوا اسم سيدنا محمد يردوا علطول.....عليه الصلاة و السلام ممتازين 11 سنة .... 11 سنة و الكفار بيؤذوا سيدنا محمد ....عليه الصلاة والسلام ..... و بيعملوا كل الأفكار الشريرة عشان يضايقوا المسلمين لكن المسلمين ثابتين و اقويا .... و صابرين و مستحملين كل الأذي ....عارفين ليه؟ عشان المسلمين عارفين و متأكدين إنهم الصح ... فمهما الكفار عملوا مش هيسمعوا كلامهم و هيفضلوا يسمعوا كلام سيدنا محمد .... و يحبوه .. عشان عارفين انه الحق ،،، عليه الصلاة و السلام . و كان فيه بلد بعيد بعيد عن مكة ...... بلد جميلة و فيه نخل كتير ..... اسمها إيه البلد دي ؟!!!! البلد دي إسمها ( المدينة ) فاكرينها ؟!!!!! اللي سيدنا محمد عليه الصلاة و السلام راحها زمااان و هو صغير مع مامته ....و هناك شاف أخوات مامته ..... البلد دي كان فيها ناس اسمهم الأوس و الخزرج ..... و عايش معاهم اليهود ... بس كل شوية ،، اليهود يتخانقوا مع الأوس و الخزرج .... و يضايقوهم .... وكل مرة يتخانقوا سوا .....يفضل اليهود يغيظوا الأوس و الخزرج ... و يقولولهم : "احنا اليهود مستنيين إن ربنا يختار النبي اللي ربنا قالنا عليه في كتبنا عشان يعلم الناس .... و اول لما ربنا يختاره ... إحنا اليهود هنؤمن بيه و نسمع كلامه علطول و قبل كل الناس .... و هنحاربكم و هنقتلكم مع النبي بتاعنا ......" و كل شوية ،، كل شوية اليهود يغيظوا الأوس و الخزرج ...... لغاية لما في يوم من الأيام .....شوية ناس من الأوس و الخزرج قالوا إنهم هيسافروا من بلدهم " المدينة " و هيروحوا مكة عشان يحجوا ..... (سيدنا إيراهيم من زمااااان هو اللي علم الناس تحج كل سنة ....) عارفييين كانوا كام راجل من الأوس و الخزرج هيروحو يحجوا ..... ؟ كانوا 6 رجااااالة ..... 6 رجالة سافروا مكة ..... و راحوا عند الكعبة .... ... و شافهم سيدنا محمد .... فسألهم : أنتم مين ؟ ردوا و قالوا :احنا ناس من المدينة اسمنا الأوس والخزرج سيدنا محمد سألهم :أنتم عايش جنبكم اليهود ؟ ردوا و قالوا : أيوة فقالهم :طب ممكن تقعدوا أكلمكم ؟؟ قالوا :أيوة وافقوا وقعدوا ... سيدنا محمد عرفهم إنه النبي اللي ربنا اختاره عشان يعلم كل الناس إزاي يعبدوا ربنا ...و كمان قرأ لهم القرآن كلام ربنا الرجالة بصوا لبعض و قالوا :أيوة فعلا ! ....احنا عارفين إن ربنا هيختار نبي ... احنا عرفنا من اليهود اللي عايشين معانا في المدينة ... و كل لما تحصل خناقة بينا و بين اليهود ..نلاقي اليهود يغيظونا ...و يقولوا إن ربنا هيختار نبي و إحنا اليهود هنسمع كلامه قبل كل الناس و هنحاربكوا و هنقتلكوا !!! بس دلوقتي احنا عرفنا خلاص إن انت النبي اللي اليهود قالوا عليه و مستنيين ربنا يختاره و كانوا بغيظونا بيك ...بس احنا هنسمع كلامك و كمان لما نرجع المدينة هنقول لكل أهلنا إن خلاص ربنا اختار النبي .... و هنعلمهم كل الحاجات اللي قولتهلنا .. خلاص احنا عرفنا إن انت النبي و أنت أعز حد ندافع عنه .. و اتفقوا مع سيدنا محمد صلي الله عليه و سلم إنهم هيتقابلوا تاني ... إمتي ؟؟ بعد سنة ...ياااااه كتير أوي ... هيتقابلوا برضه وقت الحج .... رجع الخزرج للمدينة ...و عرفوا أهلهم إن ربنا إختار النبي اللي يهود عرفوهم بيه و علموا أهلهم الإسلام ....فبقوا كام مسلم؟؟ ........ 12 مسلم...... ال 6 بقوا 12 .................... .................... .......... .................... .................... ....... و بعد سنة .. سنة كاملة ... زي ما تفقوا ،،،،سافر ال 12 مسلم من المدينة لمكة ،،، عشان يقابلوا سيدنا محمد تاني في الحج ،،، وصلوا مكة ... و قابلوه في مكان ،،، مكان اسمه ايه ؟ .. مكان اسمه العقبة ! سيدنا محمد اتفق معاهم علي اتفاق ... سيدنا محمد قالهم أوعدوني انكم تعبدوا ربنا و بس .... ما تسرقوش .... و ما تقتلوش .... ولا تعملوا حاجة وحشة و لا تقولوا كذب أو شر وأوعوا ما تسمعوش كلام سيدنا محمد لو أمركم بخير تعملوه و اللي هيعمل الاتفاق ده ربنا هيكتبله حسنات تدخله الجنة الاتفاق ده سموه (بيعة العقبة الأولي ).... عشان ده اسم المكان اللي عملوا فيه الاتفاق و اتفقوا يتقابلوا برضه بعد سنة كمان مرة .... في وقت الحج برضه .... كمان سيدنا محمد بعت معاهم ....مصعب ..... مصعب ابن عمير عشان يعلمهم إزاي يقروا القرآن صح ....و يعلمهم الإسلام دين ربنا مصعب ابن عمير سافر معاهم للمدينة ،،، و فضل يعلم اهل المدينة ،،، فسموه "مقريء المدينة" عشان هو اللي علم أهل المدينة قراءة القرآن ... و المسلمين كلهم كانوا بيحبوه أوي .. .................... .................... ...... بعد لما عدت سنة ... جه وقت الحج .. وجه الوقت اللي هيتقابل فيه المسلمين تاني مع سيدنا محمد زي ما تفقوا كل الحجاج كانوا نايمين في الخيمة ..... و قام المسلمين بشويش و راحوا عند العقبة عشان يقابلوا سيدنا محمد ... عارفين بقوا كام واحد ؟؟ بقوا 74 مسلم ....72 راجل و 2 ستات ال 12 بقوا 74 جايين عشان يحجوا برضه و يشوفوا سيدنا محمد ... بس كانوا مقررين قرار ... إيه هو؟ اتفقوا إنهم مش هيسيبوا سيدنا محمد في مكة وسط الكفار اللي بيؤذوه و يضايقوه فاتفقوا إنهم هايقابلوا سيدنا محمد في السر في نفس المكان اللي اسمه العقبة .... قابلهم سيدنا محمد و كان معاه عمه العباس .... عمه العباس مكنش لسه مؤمن ... بس كان بيحب سيدنا محمد و بيدافع عنه ضد الأشرار الكفار ... (بس سيدنا العباس هيسمع كلام سيدنا محمد في الآخر ويبقي مسلم طيب) المسلمين راحوا عند العقبة .... و قابلوا سيدنا محمد و عمه العباس ... عم سيدنا محمد .... العباس اول واحد اتكلم و قالهم : أنا عارف إنكم بتحبوا سيدنا محمد ... و عايزينه يروحو معاكم المدينة .. بس أنا عاوزكوا تعرفوا إن أنا كنت بحميه من الكفار الأشرار ... و لو مش هتقدروا تدافعوا عنه زي أقرب الناس ليكوا ... يبقي خلاص خليه في مكة و بلاش يروح معاكم وقف واحد من المسلمين و قال : هندافع عنه بأرواحنا .... و بكل قوتنا .. سيدنا محمد .... قام .... و بدأ يكلم الناس .... عن الإسلام .... دين ربنا ... اللي فيه كل الخير لكل الدنيا ... و اتفق معاهم علي اتفاق تاني : 1- إنهم يعبدوا ربنا ..... ربنا بس ... 2- إنهم يعملوا أوامر ربنا و يطيعوه 3- يدفعوا فلوس للمساكين و الغلابة و يهتموا بيهم 4- إنهم يعرفوا الناس إيه و الخير و الصح ... عشان الناس تعمله ... و يفهموا الناس إيه الحاجات الوحشة عشان يبعدوا عنها 5- إنهم يتحركوا بسرعه لأي عمل أو طلب يرضي ربنا من غير ما يخافوا من أي حد 6- إنهم يدافعوا عن دين ربنا ....الإسلام .... و يدافعوا عن النبي اللي ربنا أختاره فوقف واحد من المسلمين و قال : و الله .... هندافع عنك بكل قوتنا ! ... و هنفذ إتفاقنا بس فيه واحد من المسلمين ...وقف و قال : يا مسلمين المدينة ...أعرفوا إن لو انتم عملتم التفاق ده ... و أخدتم سيدنا محمد معاكم للمدينة ...ودافعتم عنه ... ساعتها كل أشرار الأرض هتحاربكم .... فلو مش هتستحملوا ... و هتخافوا...يبقي بلاش ... لكن لو هتكونوا شجعان ...و عندكم قوة و صبر و استحمال خلاص يبقي خدوه معاكم .... و بكده هتبقي كسبتم في الدنيا و الآخرة كمان . فرد المسلمين : كلنا هندافع عن سيدنا محمد بكل قوتنا ...ومش هيهمنا أي حد ...ولا هنخاف من أي حاجة .... و بعدين بصوا لسيدنا محمد و سيألوه :إحنا كده هيكون جزاءنا إيه ؟ رد عليهم : .................... ... الجنة . فقالوا :مد إيدك ... و قاموا كلهم يسلموا علي سيدنا محمد ... و هما بيقولوا إنهم هيعملوا كل كلمة حصلت في الاتفاق ده ... و الاتفاق ده كان اسمه (بيعة العقبة التانية ) يا تري بقه سيدنا محمد هيسيب مكة و يروح المدينة إزاي ؟ و الكفار هيسيبوه ؟ هنعرف بقه الحلقة الجاية إن شاء الله. اللهم صل علي سيدنا محمد

	الحلقة 15 كان يا ما كان ....و ما يحلي الكلام إلا بذكر النبي عليه الصلاة و السلام ....... و طبعا الحلوين المتميزين هيردوا ..... عليه الصلاة و السلام سيدنا محمد عليه الصلاة و السلام و المسلمين الطيبين .... عرفوا إنهم خلاص هيهاجروا " يسافروا " من مكة للمدينة ...و هيبعدوا عن الكفار الأشرار.. كل يوم ....شوية من المسلمين الطيبين يسيبوا مكة و يروحوا المدينة ....كل يوم شوية ..... كل يوم شوية ..... لكن سيدنا محمد لسه ما هاجرش للمدينة ..... و مش هيهاجر إلا لما ربنا يبعت ليه سيدنا جبريل عليه السلام ...عشان يقوله علي وقت السفر ..... الكفار الأشرار بدؤوا يحسوا ..... إن المسلمين الطيبين بيسيبوا مكة و بيروحوا علي المدينة .... فقالوا لازم نتجمع حالا ....و نعمل خطة شريرة ...مش هنسيبهم يمشوا ... اتجمع الكفار الأشرار في بيت اسمه " دار الندوة " .... اسمه إيه؟؟ " دار الندوة "..... و قعدوا يفكروا ..... واحد كافر شرير ...قال : احسن حاجة نحبس النبي .... فرد عليه واحد تاني قاله : لأ ..أصحابه المسلمين الطيبين مش هيسيبوه محبوس ...هيهجموا علينا .... و يخرجوه.. فكروا في حاجة تانية .... فواحد كافر تاني قال : طب ما تسيبوه يمشي هو والمسلمين و يبعدوا عننا و خلاص .... فردوا عليه : لأ ما ينفعش ... ده اي حد بيشوفه بيحبه و يسمع كلامه ... و بقي عنده اصحاب كتير .... و هيبقوا كده اقوي مننا و هييجوا يحاربونا عشان إحنا عذبناهم كتير و ضايقناهم كتير ... أوحش واحد في الكفار ...اسمه أبو جهل قالهم: أنا ...أنا عندي فكرة ....أحسن حاجة نقتل الرسول ... نختار كل الشباب الأقويا من كل قبيلة (عيلة ) ... و نجمع كل الشباب الأقوياء و يهجموا علي بيت الرسول و يقتلوه ... و ساعتها أهل سيدنا محمد مش هيعرفوا يحاربوا كل الشباب الأقوياء دول ولا هيقدروا يخدوا حق سيدنا محمد ... الكفار عجبتهم الفكرة .... و اتفقوا إن أول لما سيدنا محمد ينام .... الشباب الأقويا هيدخلوا كلهم بالسيوف و يضربوه مع بعض ياااااه إيه كل الشر ده ......ده سيدنا محمد عليه الصلاة و السلام .... افضل إنسان في الدنيا ... و أطيب قلب .... و مش بيؤذي أي إنسان ولا حيوان ولا حتي الشجر ... و نفسه يسمعوا كلامه عشان يبقوا ناس طيبة و أعمالهم كلها خير و رحمة و ربنا يحبهم و يدخلهم الجنة ... بس هما مفيش فايدة فيهم ...قلبهم كله شر .... و افكارهم كلها شر .... الكفار كانوا فاكرين إن مفيش حد شافهم ولا سمع خطتهم .... لأنهم ما يعرفوش إن ربنا بيسمع و يري كل حاجة إحنا بنعملها .. ربنا سمع كل كلامهم و شايف كل حاجة بيعملوها .... و مش هيخليهم يقدروا يؤذوا سيدنا محمد .... ربنا بعت الملاك سيدنا جبريل .... يحذر سيدنا محمد ... سيدنا جبريل قال لسيدنا محمد ... أوعي تنام في سريرك النهاردة... الكفار عاملين خطة عشان يقتلوك ... و قاله كده خلاص جه وقت الهجرة للمدينة . مين اللي كان عايش مع سيدنا محمد في بيته ؟ ؟ ؟ .... سيدنا علي ... سيدنا علي كان ولد كبير ... بس كان مسلم طيب و قوي جدا و شجاع و مش بيخاف من حاجة .... سيدنا محمد راح لسيدنا علي وقاله إن الملاك جبريل حذره ... حذره انه ينام في سريره .. و انه لازم يمشي و يسافر(يهاجر) للمدينة . بس قبل ما يسافر لازم يعمل حاجة مهمة ،،، ايه هي؟ سيدنا محمد قال لسيدنا علي لو عندنا أي حاجة أمانة بتاعة أي حد في مكة لازم نرجعهاله قبل ما نروح المدينة ... الكفار كانوا بيشيلوا فلوسهم و حاجتهم عند سيدنا محمد ،،، لانه أمين وبيحافظ علي اي حاجة الناس تشيلها عنده. سيدنا محمد في أصعب الأوقات مش بيضيع حاجة الناس و بيردها ليهم حتي لو كانوا كفار ... تخيلوا ؟! ...يعني هما بيفكروا يقتلوه ... وهو بيفكر يرجع لكل واحد حاجته (أمانته) أتجمع الشباب الكفار الأقويا عند بيت سيدنا محمد ... عشان اول لما يطلع يصلي الفجر يهجموا عليه .... و كان معاهم سيوف كبيرة ... عارفين كانوا كام واحد؟؟؟ 40 شاب قوي .....بس ربنا أقوي منهم سيدنا علي لأنه كان ولد قوي و شجاع ومش بيخاف نام مكان سيدنا محمد في سريره و اتغطي بالغطي بتاع سيدنا محمد .... شباب الكفار بصوا من فتحة لقوا حد نايم علي السرير ... افتكروه سيدنا محمد !!!! ..... بس ده طبعا سيدنا علي القوي الشجاع نايم مكانه.... سيدنا محمد عارف إنه هو الحق و الصح ...و عارف إن ربنا بيحبه و هيحميه ..... سيدنا محمد خرج من بيته .... ربنا خلي الكفار مش شايفين أي حاجة ... و بقوا واقفين زي الأصنام ... ربنا هو اللي خلق عينيهم و ربنا يقدر يخليهم ما يشفوش أي حاجة ... واقفين زي التماثيل و مش حاسين بحاجة .... وسيدنا محمد أخد تراب من الأرض .... وحطه علي راسهم .... وهو بيقول من القرآن الكريم : بسم لله ...فأغشيناهم فهم لا يبصرون يعني ربنا حط غطي علي عينيهم خلاهم مش شايفين حاجة .... و مشي سيدنا محمد و سابهم واقفين زي التماثيل .... و بعدين صحيوا لقوا شعرهم عليه تراب ....ولقوا لسه فيه حد نايم في السرير ... افتكروا سيدنا محمد نايم .... بس اكتشفوا المفاجأة اللي جننتهم !!! اول لما دخلوا ،، اكتشفوا ايه ؟ ...إن سيدنا علي هو اللي نايم ... و ربنا خرج سيدنا محمد من غير ما يشوفوه ولا يحسوا بيه ... طبعا بقوا مش فاهمين حصل كده ازاي .... سيدنا محمد عليه أفضل الصلاة و السلام لما ساب بيته ...... راح لمين ؟؟؟ راح لصاحبه ... سيدنا أبو بكر ....اكتر حد بيحبه ،، واحنا كمان كلنا بنجب سيدنا أبو بكر .... لأن سيدنا محمد كان بيحبه. .... سيدنا أبو بكر كان بيجهز نفسه عشان يهاجر ... و كان بيتمني إن يهاجر مع سيدنا محمد .... و كان مجهز جملين أقويا عشان يسافروا بيهم .... سيدنا محمد قاله ربنا بعتلي سيدنا جبريل وأمرني أهاجر المدينة ... سيدنا أبو بكر بقه فرحاااااااااااااان أوي .... لأنه هيهاجر مع سيدنا محمد اللي بيحبه أكتر إنسان في الدنيا . سيدنا محمد .... و سيدنا أبو بكر اتفقوا مع راجل من مكة إن يعرفهم طريق السفر .. و سابوا معاه الجملين .... و قرروا يروحوا مكان بعيد يستخبوا فيه ،،، عشان كانوا عارفين إن الكفار هيدوروا عليهم في كل حتة ...... فراحوا عند جبل بعيييد ....جبل اسمه جبل ثور ... و دخلوا جوة الغار ... فتحة جوة الجبل فضلوا في الغار 3 أيام .. عشان ماحدش من الكفار يقدر يلاقيهم ،، طب بياكلوا إزاي ؟ أسماء.. أسماء بنت سيدنا أبو بكر .. كانت ست شجاعة و قوية و مش بتخاف من الكفار ... ........ كانت بتجيب ليهم الأكل كل يوم .... الكفار الأشرار .... بقوا هيتجننوا .....إزاي سيدنا محمد هرب منهم ؟إزاي ما حسوش بيه ولا شافوه ؟ .... فضلوا يدوروا عليه في كل مكان .... لغاية لما واحد قالهم إنهم ممكن يكونوا عند جبل ثور ! راحوا بسرعة عند جبل ثور ....!! سيدنا محمد و سيدنا أبو بكر جوة الغار .... و شايفين رجلين الكفار ... سيدنا أبو بكر خاف لحسن يعرفوا مكان سيدنا محمد .... بس سيدنا محمد مكنش خايف .... لأنه عارف إن ربنا هينصره علي الأشرار الكفار .... سيدنا محمد بص لسيدنا أبو بكر و قاله : ما ظنك باثنين الله ثالثهما .... يعني أوعي تخاف ...إحنا ربنا معانا ..إحنا الصح و إحنا الحق ...و ربنا هينصرنا .... الكفار واقفين جنب الغار ...و لو بصوا هيشوفوا سيدنا محمد ... بس مين اللي خلق عقلهم و عينيهم ؟ ربنا و ربنا اللي خلاهم ما يقدروش يفكروا ولا يشوفوا اللي حواليهم..... و مشيوا و هما زعلانين لأنهم بقالهم 3 أيام بيدوروا علي سيدنا محمد .... ومش قادرين يلاقوه ..... ولا هيلاقوه .... عشان ربنا بينصر النبي و بينصر الحق .... و بيهزم الشر مهما كان قوي . و خرج سيدنا محمد ....و سيدنا أبو بكر من الغار .... عشان يبدؤوا الرحلة ... للمدينة ..... يا تري هيحصل معاهم إيه في الرحلة دي ؟ هنكمل الحلقة الجاية إن شاء الله اللهم صل علي سيدنا محمد

	الحلقة 16 كان ياما مكان و ما يحلي الكلام إلا بذكر النبي عليه الصلاة و السلام طبعا رد عليا الحلوين ..الممتازين و قالوا بأحلي صوت ... عليه الصلاة و السلام سيدنا محمد عليه الصلاة و السلام و صاحبه سيدنا أبو بكر خرجوا من الغار .... .. بعد لما ربنا خلاهم يفوزوا علي الكفار .... و ما قدرش الكفار الأشرار يشوفوهم و لا يعرفوا مكانهم .... وكل مرة الكفار يخططوا و يفتكروا إنهم خلاص هيكسبوا .... ربنا بيخليهم هم الخسرانين .... و يخلي المؤمنين الطيبين اللي بيدعوا ربنا و بيصلوا هما الفايزين .... خرج سيدنا محمد و سيدنا أبو بكر و راحوا للراجل اللي بيعرف الطريق للمدينة عشان يساعدهم .... راجل بيعرف إزاي لما يسافروا يمشوا في الطريق الصح ... و كمان أخدو معاهم خادم ...خادم كان بيساعد سيدنا أبو بكر ..... يعني كانوا كام راجل ... ؟ سيدنا محمد عليه الصلاة و السلام .... و سيدنا أبو بكر ... و الراجل اللي بيعرف الطريق للمدينة وخادم سيدنا ابو بكر يعني 4 رجالة ...... الكفار في مكة كانوا متغاظين و مضايقين أوي .... و مش عايزين يسكتوا ولا يبطلوا شر .... الكفار الأشرار قالوا : خلاص .... إحنا هنعمل جايزة للي يقدر يعرف مكان سيدنا محمد و راح كفار كتير يدوروا عشان ياخدوا الجايزة ... الجايزة كانت 100 جمل !! لكن الراجل اللي عارف الطريق قال لسيدنا محمد و اصحابه: أنا هوديكم المدينة بس من طريق جديد محدش يعرفه .... مشيوا مع بعض الأربعة ...من طريق بعيد ماحدش يعرفه ... لكن إيه اللي حصل ؟ و هما في الطريق شافهم واحد شرير من الكفار .... وطلع يجري بسرعة علي مكة عشان يقول للكفار اصحابه .... و كان فيه واحد اسمه سراقة ... أول لما سمع الخبر و عرف مكان سيدنا محمد ... راح بسرعة علي بيته ...و أخد أسرع حصان عنده .... و طلع يجري بسرعة عشان يلحق سيدنا محمد و ياخد الجايزة من الكفار ... سراقة خلي حصانه يجري بأسرع سرعة لغاية لما قرب لسيدنا محمد و سيدنا أبو بكر ...!!! كل اللي بيفكر فيه انه هيكسب الجايزة ! بس عارفين إيه اللي حصل ؟ أول لما سراقة قرب بحصانه من سيدنا محمد .....حصانه راح واقع في الأرض ....ووقع سراقة من عليه!!!! سراقة قام بسرعة و ركب حصانه تاني ....و خلاه يجري بسرعة تاني .... و أول لما قرب من سيدنا محمد تاني ..... إيه اللي حصل ؟! وقع تاني من علي حصانه تاااااني !!... ركب سراقة حصانه بسرعة و طلع يجري بأقصي سرعة ..... و أول لما قرب تاني إيه اللي حصل ؟؟ الحصان بتاع سراقة رجله غرزت و دخلت جوه الرمل ..و مبقاش قادر يتحرك !!! ..سراقة خااااف .... و عرف إن سيدنا محمد نبي من عند ربنا و عرف إن ربنا بيحفظ سيدنا محمد .... و عرف إنه مش هيقدر يمسك سيدنا محمد و إن ربنا هيخلي سيدنا محمد ينتصر علي كل الأشرار و الكفار مهما كانوا أقويا سراقة نده علي سيدنا محمد و قاله : خلاص ،،، اقفوا،،، أنا مش هقدر اجري وراكم تاني ومش هسمع كلام الكفار ... سيدنا محمد وقف .... و سراقة شد حصانه من الرمل و ركب عليه وراح لسيدنا محمد و قاله :الكفار الاشرار عاملين جايزة للي يعرف يمسكك ... و أنا خلاص مش هساعد الكفار تاني ... سراقة عرف إن سيدنا محمد نبي من عند ربنا و مش هيقول للكفار حاجة عن سيدنا محمد خلاص .... و سيدنا محمد سامحه. سيدنا محمد و سيدنا ابو بكر كملوا الطريق ..... و هما في الطريق شافوا خيمة ..... وواقف عندها ست كبير ....اسمها أم معبد ... راحوا عندها و سألوها : عندك لبن أو لحم نشتريهم منك؟؟؟ بس قالتلهم أنا ماعنديش بس لقوا عندها شاه "معزة " ضعييييفة و مش قادرة حتي تاكل ..... و قاعدة جنب الخيمة ... سيدنا محمد سأل أم معبد : الشاه"المعزة " دي بتطلع لبن ؟ قالت له : لأ دي ضعيفة اوي و مفيش فيها لبن سيدنا محمد سألها : طب ممكن أحلبها و أنزل منها لبن ؟ فقالتله :جرب بس دي ضعيفة و مهما بحلبها مش بتنزل حاجة ... سيدنا محمد طلب طبق كبير أوي .... و بدأ يحلب الشاه "المعزة " و نزلت لبن كتيييييير أوي !!! .... و كل الناس شربت .... و خلصوا الطبق الكبير أم معبد واقفة مستغربة جدا .... سيدنا محمد أخد الطبق الفاضي و بدأ يحلب الشاه "المعزة " تاني .... و نزلت لبن كتير تاني ...و الطبق الكبير أتملي لبن تاني ... سيدنا محمد أخد الطبق الكبير و إداه لأم معبد و قالها ده ليكي ... و مشي هو و أصحابه ... و أم معبد واقفة و مستغربة و مش مصدقة اللي حصل .... إزاي الشاه "المعزة " الضعيفة بتاعتها اللي مش بتاكل خالص تنزل كل اللبن ده .... فيه حاجة عجيبة ! أم معبد ما كنتش تعرف إن ده سيدنا محمد ...و إن ربنا بيساعده ... و بيخلي فيه بركة و خير من عند ربنا في كل مكان بيكون سيدنا محمد فيه .... بعد شوية جه جوز أم معبد و شاف الطبق الكبير اللي مليان لبن و استغرب وسألها إيه ده ؟ منين اللبن ده ؟ احنا الشاه بتاعتنا مش بتجيب لبن خااالص .... فحكت له الحكاية .... جوزها قال : ايوة انا عرفت مين ده .... ده أكيد النبي اللي بيقولوا عنه في مكة ... أنا لو شوفته هسمع كلامه و هعمل كل الخير اللي يقولي عليه .. سيدنا محمد و أصحابه كملوا طريقهم ... خلاص قربوا يوصلوا المدينة ... وصلوا مكان اسمه قبااااء ....اسمه إيه ؟ قباااااء ... و بنوا مسجد ....اسمه مسجد إيه ؟؟؟ مسجد قبااااء.... و بعد كده كملوا طريقهم لغااااااااااااية لما وصلوا المدينة .... و هناك كان كل المسلمين الطيبين مستنييين مستنييين سيدنا محمد ...اللي بيحبوه أكتر حد في الدنيا .... سيدنا محمد اللي ربنا اختاره عشان يعلم الدنبا كلها يعلمها الخير و الحق و الأعمال الطيبة .... عشان يكونوا مؤمنين طيبين صالحين و ربنا يدخلهم الجنة أخييييييييييرا أهل المدينة الطيبين شافوا سيدنا محمد .... جاي من بعيد .... بقوا فرحانين ..... فرحانييييين أوي و ندهوا علي بعض و جريوا علي سيدنا محمد و اصحابه .... أخيرا ! أخيرا ! سيدنا محمد وصل المدينة ! --------------------- تنويه للامهات ،،، رغم ان نشيد طلع البدر علينا مشهور انه قيل في استقبال النبي عند الهجرة ،، إلا اني وجدت في كتب السيرة ان الامر فيه اختلاف كبير لان الاحاديث الواردة في امر النشيد ضعيفة ،،،و انه قيل في مناسبة اخري بعد عودته من احد الغزوات ،،، و الله اعلم ،،، --------------------- كل واحد من المسلمين الطيبين بقه يشد الجمل بتاع سيدنا محمد عند بيته عشان نفسه سيدنا محمد ييجي و يعيش معاه بس سيدنا محمد قالهم سيبوا الجمل و ربنا هيوقفها عند المكان اللي هعيش فيه ... فكلهم سمعوا كلام سيدنا محمد و بعدوا عن الجمل .... ففضلت ....ماشيه ...ماشية .... لغاية فييين ؟؟؟ سبحان الله !!! فضلت ماشية لغاية بيت أخوات مامة سيدنا محمد (يعني خيلانه ) يعني قرايب سيدنا محمد و الجمل قعد في الأرض .... فعرفوا إن ده المكان ..... عند بيت أبو ايوب أبو ايوب الأنصاري ... هو ده البيت اللي عاش فيه سيدنا محمد .... و جنب المكان ده بنا سيدنا محمد و المسلمين مسجد ....مسجد الرسول عشان كل المسلمين يصلوا فيه .... و كمان بنا بيت عشان يسكن فيه ... و سيدنا محمد عرف كل المسلمين إنهم أخوات .... مسلمين من المدينة (الأنصار) أو مسلمين من مكة (المهاجرين) ...كلهم أخوات المسلمين من أي مكان .... أخوات .... يخدوا بالهم من بعض و يساعدوا بعض و يحبوا بعض . فبقي كل واحد مسلم معاه حاجة يديها لأخوه اللي مش معاه ... كمان كان فيه يهود في المدينة ..... سيدنا محمد قال لليهود إنهم في أمان طول ما هما مش بيؤذوا المسلمين . سيدنا محمد بيعلم الناس الأخلاق الطيبة اللي ربنا يحبها تكون فينا ... بس يا تري اليهود هيختاروا انهم يعيشوا بأمان؟ هنعرف الحلقة الجاية اللهم صل و بارك علي سيدنا محمد .

	الحلقة 17 كان يا ماكان ....و ما يحلي الكلام إلا بذكر النبي عليه الصلاة و السلام وولادي حبايبي هيردوا طبعا ....عليه الصلاة و السلام أخيرا وصل سيدنا محمد للمدينة ....البلد الجميلة .... و كمان كل المسلمين الطيبين اللي كانوا في مكة ... سافروا للمدينة (هاجروا)...زي سيدنا محمد .... مبقاش فيه في مكة غير مسلمين شوية صغيرين مش قادرين يسافروا . ..اهل المدينة المسلمين ... كانوا فرحانين اوي إن سيدنا محمد هيعيش في بلدهم المدينة ... و كمان فرحانين ان المسلمين أخوتهم اللي في مكة هييجوا عندهم المدينة ... المسلمين اللي هاجروا للمدينه سيدنا محمد سماهم ،،،،المهاجرين عشان هاجروا من مكة بلدهم ،،، و المسلمين اللي كانوا عايشين في المدينة سيدنا محمد سماهم الانصار عشان نصروا الحق ... و بقي كل واحد من أهل المدينة (الانصار) يساعد أخوه المسلم اللي جاي من مكة(المهاجرين) ... يدولهم فلوس و اكل و بيت يعيشوا فيه و يساعدوه يبقي عنده زوجة و بيت و اسره ،،، المسلمين اخوات دايما .. أخيرا بقي المسلمين عايشين بأمان بعيد عن اذي الكفار الأشرار بس يا تري كل اللي في المدينة مسلمين طيبين مؤمنين ؟؟ لأ لأ !!... المدينة كان فيها اليهود و المنافقين مين دول ؟؟ اليهود كانوا ناس ربنا بعتلهم زماااااااان نبي اسمه سيدنا موسي .... و سيدنا موسي قالهم زمان لما ربنا يختار سيدنا محمد اسمعوا كلامه ...لأنه نبي من عند ربنا وقالهم علي شكله و صفاته و اسمه فكانوا عارفين إن ربنا هيختار نبي عشان يعلمهم الحق ... و كانوا دايما يقولوا لكل الناس في المدينة ... احنا هنؤمن بالنبي قبلكوا و هنحاربكم معاه ... و هنبقي احنا اصحاب النبي بس عارفين ايه اللي حصل ؟ أول لما عرفوا إن ربنا اختار نبي خلاص ...قالول لأ لأ ...أحنا مش هنؤمن بيه ولا هنسمع كلامه ... لييييييييييييييييييه ؟؟؟؟ إحنا كنا عايزين ربنا يختار نبي من اليهود ... احنا عايزين واحد مننا ...واحد من اليهود !!! إشمعنا النبي ما يكونش مننا ؟؟؟!!! ينفع حد يقول الكلام ده ؟؟ ربنا بس هو اللي يختار مين أحسن واحد يكون نبيه ... و ربنا بس اللي يختار مين اللي يعلم الناس الحق مش هما اللي يختاروا ربنا أعلم منهم بكل شيء دول بقه اليهود !!! هما و المنافقين كانوا أشرار أما بقي المنافقين فدول كانوا من اشر الناس عارفين المنافقين كانوا بيعملوا إيه ؟ كانوا بيقولوا تيجي نعمل نفسنا مسلمين ؟؟ و كمان نصاحب المسلمين و نضحك عليهم و نعرف أسرارهم و نروح نقولها لليهود الأشرار و نعمل نفسنا بنصلي قدام المسلمين،،، عشان يفتكرونا مؤمنين ،،، ... لكن في الحقيقة مش بنصلي ولا إحنا مسلمين ولا حاجة ! دول بقة أوحش ناس ... و أوحش كمان من الكفار ... و هيكونوا في أوحش مكان في النار ،، وربنا هيعذبهم اشد عذاب لانهم بيخدعوا المؤمنين الطيبين . كده عرفنا مين اللي كان عايش في المدينة : مين ؟ المسلمين الطيبين مهاجرين و أنصار و كان معاهم شوية أشرار من اليهود و المنافقين

	الحلقة 18 (غزوة بدر) كان يا ما كان و ما يحلي الكلام إلا بذكر النبي عليه الصلاة و السلام ... و أحلي ولاد .. هيردوا طبعا علي طول .... و عليه الصلاة و السلام المسلمين الطيبين سابوا الأشرار الكفار و راحو عاشوا في المدينة ... بس سابوا في مكة كل حاجتهم ... بيوتهم و فلوسهم و دهبهم ،،، طب يا تري الكفار الأشرار هيرجعوا للمسلمين حاجتهم ؟؟؟ لأ طبعا عارفين الكفار عملوا إيه ؟؟ أخدوا كل حاجة المسلمين و بيوتهم و فلوسهم و بقوا فرحانين و قاعدين يقولوا ههههههه احنا خلينا المسلمين يروحوا المدينة و اخدنا حاجتهم و هنوزعها علينا ... و كمان هنروح نشتري بفلوس المسلمين حاجات كتير لينا و هنعمل قااااافلة كبييييرة ... مليانة جمال كتير و نروح نشتري و نبيع و نكسب فلوس كتير كمان... عشان نفضل نضايق المسلمين و نحاربهم ... و ما نخليش حد يسمع كلامهم . فالمسلمين قالوا خلاص ،، احنا هنعمل خطة علي الكفار مش هنخليهم يعرفوا يشتروا و يبيعوا أي حاجة ... هنعمل عليهم خطة و هناخد القافلة اللي فيها جمال شايلة فلوس و بضايع و مش هنخليهم يعرفوا يشتروا ولا يبيعوا الكفار عرفوا إن المسلمين هيهجموا علي القافلة بتاعتهم فخلوا القافله تهرب لمكان بعيد ... وراح الكفار جمعوا كل قوتهم ... و قالوا هنروح كلنا علي المدينة ... و نحارب المسلمين ،،، كان عددهم كبييييير جدا 1000 كان كام واحد ؟؟ كانوا 1000 واحد من الكفار ******************** ********* سيدنا محمد في المدينة و معاه المسلمين سيدنا محمد سألهم : رأيكم نعمل إيه ؟؟ وقف واحد مسلم ( سعد بن معاذ).... ... مسلم شجاع و قال : يا رسول الله احنا مسلمين المدينة آمنا بك و صدقناك و هنسمع كلامك في كل أمر هتؤمرنا بيه فاعمل امر ربنا و احنا هنكون معاك ...في كل أمر هتؤمرنا بيه سيدنا محمد اتبسط من المسلمين و قوة إيمانهم و شجاعتهم .... سيدنا محمد عارف إن ربنا هينصر المسلمين ... لو قالوا كلمة الحق والكلام الصح و بقوا شجعان و بقوا عارفين ان ربنا هيخليهم ينتصروا المسلمين كان عددهم قليل أوي ...بس ربنا هينصر المؤمنين ... حتي لو عددهم قليل لأنهم بيدعوا ربنا كتير و بيحبوا ربنا المسلمين كانوا كام ؟؟؟؟ كانوا 300 واحد و معاهم حصانين بس!!! ... و جمال حابة صغيرين طب يعملو ايه ؟؟... قالو كل شوية نبدل مع بعض ...شوية ناس تركب علي الجمال و شوية يمشوا و بعد كده نبدل مع بعض ... عشان ما نتعبش من المشي بس سيدنا محمد نخليه راكب علطول لكن سيدنا محمد قالهم لأ أنا همشي زيكم عشان آخد حسنات و ثواب عند ربنا ووصلوا لمكان و اتجمعوا فيه عشان يستنوا الكفارالأشرار و يحاربوهم فقام واحد من المسلمين ،،، مسلم عنده خطة ذكية ،، اسمه "الحباب بن المنذر" "الحباب بن المنذر" سأل سيدنا محمد : ... هو ممكن نغير المكان اللي احنا هنحارب فيه ولا المكان ده ربنا أمرنا بيه؟ فسيدنا محمد قالوا لأ ده مش أمر من ربنا ...ده ممكن نغيره فالمسلم الذكي قال خطة حلوة جدا "الحباب بن المنذر "قال : "...احنا هنا في مكان في الصحراء مفيش فيه مايه خالص إلا عند بئر بدر ... ... احنا نروح عند الماية و نشرب و ما نخليش الكفار يعرفوا يشربوا فيتعبوا من العطش" سيدنا محمد وافق علي فكرة .... و راح المسلمين عند بئر بدر،،، وقف المسلمين صف جنب بعض معاهم .. و مجهزين أسهم كتير ...و كل واحد معاه سهم قوي ... ومستنيين الكفار .... عشان أول لما ييجوا يرموا عليهم السهام القوية ... سيدنا محمد وقف يدعي ربنا ... دعا ربنا من كل قلبه ،،، يا رب الكفار بيحاربوا الدين و بيحاربونا إحنا عشان مؤمنين .... يا رب انصرنا عليهم ...يا رب انصرنا عليهم ... فضل يدعي ربنا كتير ،، من كل قلبه . وصل الكفار ...و هم مغرورين بقوتهم و عددهم طلع 3 من جيش الكفار و قالوا : احنا أقوي 3 من الكفار .... فين الأقويا اللي عندكم يا مسلمين ؟ سيدنا محمد خرج 3 من المسلمين : سيدنا علي و سيدنا حمزة وسيدنا عبيدة هجم ال3 مسلمين الأقويا علي 3 كفار .... و ال3 مسلمين الابطال ضربوا ال 3 كفار الأشرار و قتلوهم ... فهجم الفريقين علي بعض ...وقتل المسلمين كفار كتير .... و عشان المسلمين بيدعوا ربنا و بيسمعوا كلام سيدنا محمد و بيطيعوه ربنا خلاهم يكسبوا الكفار حتي لو كان عددهم صغير ... المسلمين كسبوا الكفار الأشرار .... و خاف بقيت الكفار و طلعوا يجروا علي مكة و هما خايفين و خسرانين و مرعوبين من قوة المسلمين ... و المسلمين مسكوا شوية كفار (أسري ) و خدوهم معاهم المدينة .... و رجع سيدنا محمد و المسلمين للمدينة و هما مبسوطين بنصر ربنا اللهم صل علي سيدنا محمد