قصيدة ' طعنة غدرّ " للشاعر حمدان المالكي

كل المرارات ... ماتعدل ... بلحظة غدر
طعنة ظهر من ضعيف النفس ياشينها

الطعنه الّي ... نهايتها ... بموت وقبر
يرقص عليها خبيث النفس في حينها

الضربه الغادره .. منها يضيّق الصدر
ويسيل دمع المحاجر .. من وسط عينها

لو جت من اغراب ..لا يمكن تزل وتمر
فكيف لو جات ... من ناسً موالينها

من يقرب النار .. لازم ينكوي بالجمر
مديون والنفس ... لازم يندفع دينها

المال لا من ... فقدته .. مايسمى فقر
الفقر فقر الضمير إن مات بسنينها

العود الاصلي بطول الوقت مايندمر
يزيد طيبه ... مع الايام ... ويزينها

والحكمه الّي تقل قطرات غيث انهمر
يسقي صحاري ويروي عشبةً بينها

من يحسب إن الفقر مثل الغدر والقهر
الغدر والقهر ... مايسلم .. منادينها

لابد من دورة ... الايام ... صبح وعصر
من يسقي الناس كاس الغدر لاقينها

بعض المواضيع .. فيها مايطول الصبر
نهاية الخاين ... اقرب من مضامينها

يالله انا طالبك ... يااارب ... طول العمر
واشوف من خان يوحل في وسط طينها