مالك ياقلبى حزين
لسة بتفكر فى اللى كان
بعد مرور الأيام والسنين
عايزنا نرجع زى زمان
ماراحوا الناس الطيبين
وكل من عليها فان
لا عاد فيه صاحب أمين
ولا صديق نضمن عنده الأمان
ماخلاص الدنيا إتغيرت
وإتغيرت أحوال الإنسان
كان فيه زمان محبة
والقلوب مليانة حنان
النهاردة القلوب أسية
ماحدش بيسأل عن الغلبان
وتلاقى الأفراح والزغاريط
والجار عنده وفاه وأحزان
معدش فيه مراعاة للمشاعر
وكسر الخواطر مش فى الحسبان
والكراهية ملت القلوب
وفى المصايب ألف ومية شمتان
والحقد بياكل فى القلوب
زى الهشيم وسط النيران
والظلم ياما ضيع حقوق
والعدل إختفى ومعدش يبان
راح فين الشاب التقى
اللى كان بالحياء مليان
لو مرت جنبه صبية
ينظر فى الأرض مغمض الأجفان
كان طريقه طريق الهدى
وعلى وشه نور التقوى والإيمان
بقينا نشوف شباب فاسد
يمشى فى الشوارع عريان
فيه البلطجة وقلة الحياء
ويخدش حياءك ببزاءة اللسان
بعيد عن طريق الهداية
وماشى فى طريق الشيطان
معلش ياقلبى إنسى
مش هترجع تانى أيام زمان
ماخلاص كل حاجة حلوة راحت
المحبة والحياء والأمن والأمان

كلمات .. حمدى شاهين