حنا واسامينا برحله اقصيره
ياحظ من له سمعةٍ تملي العين
،
والموت درب ،، وكلنا في مسيره
يعني بنرجعله ولاندوم ،، حيين
،
نمشي ونركض والخطايا كثيرة
وبعدين صوب القبر ماشين ماشين
،
من حط هالدنيا بعينه صغيره
انشهد انه عارفً دربها ،،، زين
،
ومن ذاق ويلات المرض في سريره
مايشبه اللي نام نوم السلاطين
،
ومن لف كل الكون ديرة بديرة
ماهو مثل من سكّر الدين بالدين
،
ومن جرب الحاجه وروحه كسيره
يفرق عن المرتاح وابو الملايين
،
لاتحسد الأمير ،،، والا الاميره
وأوصيك لاتضحك بناسن ضعيفين
،
ولاشفت وجه المبتلي لاتثيره
إفزع له بدعوه وحث المصلين
،
يدعيله اللي عارفن وش مصيره
واللي بيشمت فيه هو المسيكين
،
رحاة هالدنيا ترى مستديره
دكاترة ياخوك صارو مجانين !!!
،
تحمدالله ،، واشكره ،، واستخيره
ومدامنا في صحه وخير راضين
،
وإن ماحصلك ماتمناه / خيره
مردها وإن ضاقت أعوام / بتزين
،